H-E-J-N-O-M <=> 芒姐再現之...舊日的足跡+英倫遊記

芒姐再現網址: "http://hejnom.blogspot.com/"... 前身為"芒姐.diaryland.com"

星期五, 4月 01, 2005

4-1(fri) 愚人節

o岩o岩搭的士經過文華, 又見到一大堆人結集o左o係酒店出面…大家都會記得係咩事啦! 記得上年o既呢一日上完堂, 特登走去文華望o下…果然係好多人! 之後o係我公司樓下仲有燭光晚會添! 咁又一年喇! 兩年前o既愚人節發生o既事, 相信大家都仍然記憶猶新…真係愚人節最大o既整古!

去年:
4月1日

前年:
陪伴我們那代香港人成長的“哥哥”

呢兩個禮拜正寫緊關於“5虎”o既稿, 今日居然o係d. court門口撞到戚美珍同佢兩個仔女, 佢個女已經去到尷尬年齡, 醜樣過以前好多! 我印象中佢好細個已經係好貪靚o個隻…但係反而依家變到咁o既樣! 個仔就仲算幾靚仔o既…不過同苗僑偉差好遠!

再下個禮拜就播“學警雄心”, 好期待…期待睇久違了o既苗僑偉再次o係電視出現! 同埋個劇種我都ok buy…“新?師兄”o個一類…但當然無得比啦! 其他演員都ok o既, 吳卓羲都係做番時裝型好多! 陳鍵鋒就…我仍然有d驚佢會俾風吹走囉! 至於薛海琪個短髮look…真係200個樣衰…原來髮型真係會咁影響一個人…所以話, 千祈唔好亂咁搞個頭!

呢幾集o既“心花放”無聊到極點, 咩老套劇情都出晒o黎…如果10年前拍o既話或者都ok o既…食住“同一屋簷下”同埋“大勇&jessie”個勢, 可能會討好好多…但依家無論劇情定演員都好out, 仲好有似曾相識o既感覺! 尤其前晚陶大宇去醫院搵郭可盈, 郭可盈叫佢話唔好再搵佢, 咁樣佢會好辛苦etc…exactly係當年“刑偵2”有一集講大勇同jessie分o左手, 有日jessie撞車, 大勇去醫院探車匙咁.

仲有另一幕係講郭可盈要走, 陶大宇去機場追番佢...我諗大家都會記得“刑偵2”最後一幕大勇去機場叫jessie留低, 跟住失o左憶o既車匙依舊又係話咩都唔記得…跟住大勇就拿舊爛鬼石頭定唔知咩出o黎話如果你記得就望番轉頭啦…(大佬! 當年真係好經典o架! 大結局o個晚我有諗過唔去補a. maths留o係屋企睇…橫掂補習都係同d同學聯誼多d…但係諗諗o下都係錄o左佢深夜睇番好過, 事關我睇電視時要好專心, 唔可以俾人騷擾!)…呢d劇情可能當年真係掂o既, 但係十年後o既今日又再翻抄, 未免太過欠新意! 仲有, 陶大宇o既“1號表情”…真係唔該晒!

同埋我唔明點解依家蘇志威同陳琪成日做一對…唔通tvb想撮合佢o地成為螢幕情侶?!