H-E-J-N-O-M <=> 芒姐再現之...舊日的足跡+英倫遊記

芒姐再現網址: "http://hejnom.blogspot.com/"... 前身為"芒姐.diaryland.com"

星期三, 7月 20, 2005

7-20(wed) 掌門人

Weekend睇到一系列o既“掌門人特輯”, 又回顧又水上show…o個個 “繼續無敵掌門人不敗之謎”節目播番十年來掌門人o既片段…哎! 咁就十年…好感慨! 我o地亦都由首播時o既F.5學生, 變到依家“各有成就”…! 雖然有d片段睇o左好多次, 因為幾乎每次做完一輯都會播一次, 尤其初期o個d更甚…不過早期o個d環節又真係好睇好多o既, 好似打pingpongball, 食壽司同埋玩“tvb個b”…好笑過依家o個d幾百倍…仲有有一集有劉華, 頭大宇, 歐陽波比, 梁榮忠, 曾華倩亦都係一大經典…當年師奶殺手大紅, 咩節目都有佢份…我亦都係佢“fans”之一, 大勇+車匙曾是我的最愛…所以呢集我都有錄起 (不過10年來都無拎番出o黎, 依家餅帶發o左霉)…十年實在過得太快…最勁就係掌門人同d掌老十年來個樣都無咩點變!

跟住睇完獎門人居然係做o個個咩處境喜劇 “窈窕熟女”…見到o個4個女人都完全無興趣…仲要有呀叻就更加唔該晒…佢做主持已經唔多掂o架啦, 依家仲要做埋戲…好可怕! 同埋處境喜劇一個禮拜做一次係唔多work o架…完全無o左個追看o既衝動! 你話放o係禮拜一至五, 都話唔覺意食食o下飯或者larp到一集咁就順便睇埋落去呀…今次呢個完全係一個bad move!

曾幾何時o係“真情”年代我係幾鍾意滕麗名(明)o架, o個日larp到“尋秦記”開頭, 先記得原來佢有份做, 仲要當年我係有d為o左睇佢先開始睇呢套戲…但係依家漸漸發覺佢唔多掂, 再加上睇得佢d負面新聞多…成日有d “暗名”o既新聞話佢態度囂張, 對人差, 馬德鐘仲話曾經俾一個女藝員白眼…講完一輪特徵應該係講緊佢! 最樣衰o既係佢當年睇唔起o既人, 今日人o地紅過佢百倍!

最騎呢o既係禮拜日晚勁歌居然有趙學而, 車婉婉同埋陳奕迅cross-over…好騎呢! 林玉露+萬貴妃+eason…仲要趙學而紅o既時候, eason先係新人…但係大家依家地位差咁遠! 佢隻“尋開心”當年真係好鬼hit o架…我好鍾意聽, 仲次次去卡拉ok都要唱…我好記得97年商台一連三日o係添馬艦搞o左個大型音樂博覽叫咩 “天馬行空音樂會”…好鬼死精彩…趙學而仲因為唱佢呢隻“尋開心”+玩手語+有d“sm”feel o既舞台演繹而o係新進歌手中突圍而出, 拿o左個唔知咩獎! 千嬅隻“2丁6”都有入圍o架! 呢個show真係幾好睇…當年餅帶我都重溫o左n次!

但係趙學而又做番歌星咩? 好耐無聽過佢唱歌, 但仍然幾有水準…好過依家d當紅歌星好多! 唔知佢可唔可以好似克勤咁做完一輪勁歌主持再拍完一輪戲, 然後鹹魚翻生呢?! 我都好期待再聽佢唱歌…佢初出道o個幾隻咩“每隔兩秒”, “反叛情歌”, “我恨我是女人”…o係10年前真係好hit o架! 當年佢直頭係第二個古巨基…兩個都係由“娛眼”主持轉型做歌星, 又係一出時都好成功, 拿晒新人獎…但又沉寂o左一排! 依家古巨基都紅番, 趙學而都係時候發力啦…唔好再?o係無線做埋d八婆角色…完全係o徙o左, 我諗佢都唔甘心!

同埋我仍然要衷心講多一次 (其實聽佢唱一次歌就要講一次)…盧巧音唱live真係好唔掂, 即使以偶像派o既standard佢都係嚴重below average…最可怕係佢居然一出道就自命實力派…點解會有d咁不可思議o既事?! 簡直係“不可思議星期二”!!!