H-E-J-N-O-M <=> 芒姐再現之...舊日的足跡+英倫遊記

芒姐再現網址: "http://hejnom.blogspot.com/"... 前身為"芒姐.diaryland.com"

星期一, 1月 05, 2004

1-5(mon) 香江花月夜

上個禮拜5晚開始有“香江花月夜”睇, 大家記住睇呀!

好就唔係話特別好睇, 勝在夠經典嘛…梅姐o既唯一一套電視劇, 點都要睇o下…雖然小時候其實已經睇過唔知幾多次呢套劇…仲好記得有位家人成日o係度扮梅姐o既語氣講o個句佢o係戲入面成人講o既“不必喇!”...所以印象特別深刻! 大家記住要留意o下 (o係套戲o既中段至尾聲先有)!

但係我想話, 梅姐o係80年代把聲真係太卡通, 好奇怪…好似睇緊“IQ博士”咁…上次o個隻經典“緣份”vcd, 又係發覺佢把聲超怪…係呢十年間先正常番好多, 個人仲愈o係愈後生, 愈o黎愈順眼, 愈o黎愈靚! 尤其係今年o個個金毛短髮look, 好清爽, 好有型! 佢患癌症都可以保持到呢個狀態, 其實真係好難得!

尋晚一路睇佢個紀念特輯一路食萍果, 點知撞o岩係臨結尾o個part, 播番佢個幾月前o個個電視特輯, 同埋最後o係佢個真正“告別”演唱會度唱最後一首歌…“夕陽之歌”! 仲要講埋d咩“夕陽無限好, 只是近黃昏”等說話, 再著埋婚紗徐徐步上樓梯, 臨尾回眸向大家揮手講再見…睇到我好心o翕好心o翕囉…差d連個萍果都想嘔番出o黎 (你知個心翳住其實係會令人有想嘔o既感覺o架啦!)!

睇完個show成個心都實晒, 眼濕濕咁…真係好少睇show睇到我喊得出, 即使連哥哥半年前o個個個紀念特輯都無咁感動到我…可能個分別係所有人之前已經預知佢會死, 成個演唱會本身就一片愁雲慘霧…尤其佢自己o個種發自內心o既無奈, 真係睇到人好難受!

真係好慘…短期內都唔好俾我再睇到呢d咁o既紀念特輯…實在係受唔住! 有咩可能o係一年內有兩位天皇巨星咁樣離我o地而去, 仲要兩個都咁經典, 兩個o係舞台上都咁有懾人o既魅力, 兩個都係我最喜愛o既80年代裏面o既獨有icon…尋晚播番85年o既“耀保良”定唔知咩show (分別o係佢兩個o既紀念特輯都有剪出o黎播o既片段), 睇番佢兩個合作又唱又跳“冰山大火”, 真係好精彩, 睇到我直頭目不轉睛…真係估唔到, 一年內睇o左兩次, 個感覺仲要一次比一次慘!

我親愛o既80年代依家只係剩番阿校長…但係講到“屬於舞台", 佢始終拍馬都追唔上哥哥同梅姐, 不過佢個感覺就比較親切囉 (呢個只係我細個時o既感覺, 依家就完全唔覺喇!)