12-20(sat) 2003十大中文金曲 (上)

無錯, 尋晚我又去o左睇頒獎禮, 係無啦啦提早o左成個月做o既 “十大中文金曲”! 同事們話:“嘩! 你連呢d都走去睇, 真係好瘋狂喎!”…我想話, 我幾乎年年都會去現場睇十大中文金曲o架喎…因為根據我過去去其他頒獎禮o既經驗 (除o左新城o個個, 因為直頭連睇o既興趣都無!) 所得出o黎o既分析結果 (我唔記得有無o係呢度講過, 如果有就請容忍我repeat myself)…o係4台o既頒獎禮入面, 係唯一呢個可以考慮去現場睇!

原因係無線個頒獎禮根本就係一個專for電視o既show, 完全只係會照顧佢d“電視機前面o既觀眾”, 所以o係屋企睇絕對會好過去現場; 至於“叱吒”…就太過有佢自己o既一套, 仲要迫晒全場人接受佢o個套, 除非你好buy (無可否認o係90年代初我都曾經幾buy o既), 否則你會覺得好惡頂…就好似去o左一個保險業聚會, d保險公司從業員 (o係呢度係指俞琤同佢班DJ) 不斷咁向你灌輸佢o地o既理念, 仲要迫你認同係最好o既…好騎呢! 至於新城…直頭唔洗講, 都唔知咩頒獎禮o黎o既, 一片混亂, 又巧立名目, 頒埋d唔知係咩o既獎, 仲要連獎都可以頒錯…所以呢個可以唔洗理!

尋晚以為呢d電台show實準時啦, 點知都係遲o左d…等我o地仲一放工就碌到咁去, 趕快咁食o左少少o野, 仲為o左快d飲完杯熱o野而“淥”到條“月利”爛咁滯…好可憐呀! 搵笨o架!

今次個show o係會展舉行…一個我好憎o既場地. 一向都覺得會展真係唔適合搞show, 最多係俾佢做d書展呀, 咩展物展o既場地; 但係睇show真係唔多好...每一個位都睇得唔多清楚!

好記得上年“中文金曲”25周年, 特別走o左去沙田馬場舉行, 之前仲好似有d fun fair咁o既物體添…好特別! 舊年好想去睇, 又偏偏無得睇…最鍾意d o係特別場地搞o既show o架嘛! 好記得當日我o係英國仲特登早d起身, 好準時咁下午12點跑到去學校其中一個computer centre度霸頭位坐定定咁聽現場直播 (註: 我當時個hall o既internet connection係…其實大家如果一路有睇都知道咩事o架啦), 好落力o架…永遠都係你無得睇就特別想睇o架啦! 同埋舊年d歌好明顯係好聽好多, 又粒粒巨星, 再加上係銀禧紀念, 有一半個show係去o左回顧25年o黎o既金曲同埋紅人…呢d一向係我最鍾意睇o既!

(cont.)