4-1(tues) 陪伴我們那代香港人成長的“哥哥”

我相信o係呢一刻, 你打開收音機聽任何一台, 都會聽到同一把歌聲! o係幾個鐘?面, 同一隻歌我基乎都聽o左4,5次, 尤其係佢d大熱作品!

8點幾同朋友講電話o既時候, 佢忽然話俾我聽張國榮死o左, 仲要係跳樓死添! 講真, 我又唔係太過 (不過點都有d) 愕然, 因為人生?面o既 “無常” 事實在太多, 而且阿哥哥不嬲都有好多你估佢唔到o既事情! 我聽到呢個消息時o既唯一疑問係:“咁阿唐唐點呢?”之後就開始周圍 “手禁”電視同埋開收音機聽o下有咩消息, 點知都係無喎! 要等到成8:30, 港台先o係新聞報導講呢單消息, 無線仲要連“特別新聞” 都無; 要等到後來“新聞提要”講完“淘大”o個單o野先講…俾著以前有咁出名o既人自殺, 一定即刻出特別新聞…可能依家個時勢真係唔同o左!

話過唔想再o係呢度講d唔開心o既o野, 點知就一單接一單, 香港真係邪! 今日仲邪到傳出話香港會成為“疫埠”o既謠言, 所有超市掀起搶購潮…真係吹漲! 都話似10幾年前o既8號風球咁o架啦…d人好似發o左癲咁瘋狂入貨! 但其實變“疫埠”同搶購食物又有咩關係呢? 變疫埠都唔會無晒o野食o卦? 香港人幾時變到咁無知o架? 不過香港人o既“羊群心態”就不嬲出晒名o架喇! 從當年o既“芝士旦糕排隊潮”已經可見一斑!

不過最最最邪o既係我忽然間醒起我o係倫敦時成日睇o個套“喝采”, 3個男主角相繼逝世! 先有鍾保羅, 跟住係陳百強, 依家連哥哥都自殺死埋…你都唔好話唔邪! 對唔住, 我係唔應該導人迷信o既…不過我真係忽然諗起覺得有d邪嘛!

o岩o岩聽港台, 個DJ正o係度播緊哥哥o既一系列經典快歌; 仲播o左兩次佢o既最hit勁歌“MONICA”(連無線晚間新聞都揀o左呢首MV片段o黎播, 唔知今晚會唔會有佢o既特輯重播呢?)…話因為當時呢隻歌除o左大熱之外, 仲令到好多女孩子因而改名叫“MONICA” 喎!

台台都播緊紀念張國榮o既特輯, 我都唔知聽得邊台好…最終就係“手禁”來 “手禁”去, 然後依家停o左o係港台…最特別係聽到港台一台個特輯, 倪秉郎問鄧慧詩以前係咪同哥哥拍拖, 佢居然直認不諱! 睇“IQ成熟時”o既時候, 成日都覺得鄧慧詩好鬼作狀, 估唔到佢同哥哥會有一段情! 更愕然o既係, 佢爆話原來哥哥o既退出係被人逼o既…仲要係每日去恐嚇佢o個隻, 叫佢讓條路俾其他人行…嘩! 真係好黑暗呀! 原來d人多年o黎話佢“姣婆守唔到寡”, 真係冤枉o左佢…根本佢都唔想退出, 係被逼o既! 哎, 本來心情都無咩特別o既; 但係愈聽得多佢d回顧特輯, 就愈係心o翕囉!

另外, 今日睇到淘大居民繼尋日o既“隔離令”之後, 今日仲接到政府o既“搬遷令”…兩樣我都未聽過, 真係聞所未聞! 我一路睇一路諗, 如果我係佢o地會點呢? 究竟佢o地做錯d咩要換o黎咁o既待遇?…個答案係無呀! 完全唔係佢o地o既錯! 俾人隔離都可以接受, at least 可以留o係自己屋企, 睇o下電視, 上o下網…做咩都好啦…要我留o係屋企10日我相信我都可以自得其樂o既; 但係你無啦啦要人搬去個渡假營 (exactly 係我o地中學去O’CAMP o既camp site…住兩三日都OK o既, 長住就…!), 咩娛樂都無晒, 仲要得兩三個鐘俾人執o野…完全無所適從! 正如d居民所講… “連難民都不如”囉…好慘!