10-11(tues) 日落巴黎之旅 (下)

今次呢個trip就真係勁食, 雖然無去"breakfast under eiffel", 但都食o左好多美食...仲要一日到晚都o黎個full course, 每日都捧住個肚返酒店! 今次d酒店都自幾ok (以佢不太貴o既價錢論), d床又大張, 服務亦都ok! 本來驚言語不通好難搵到d路, 但佢d路原來出奇地易搵, 比起英國d map易睇d添呀! 同埋行兩步就有metro, 都幾方便!


(兩種味道不同但都咁好味o既鹹甜crepe)


個個都叫我o黎法國記得買多幾個LV, 可惜我又係十萬個都無一個o既"不喜歡shopping的女性"...我都知我奇怪o架喇! 不過唔shopping有樣好, 可以慳番好多錢去食好o野, 亦都慳番好多時間...很好呀! 反而我去旅行係鍾意胡亂咁周圍行...行到邊睇到邊...連車我都唔多鍾意搭!



留耐o左發現其實巴黎同倫敦個感覺都幾相似, 總之就係他他條條, 優哉悠哉咁, 同埋兩者都係有條河o係中間, 再以一大堆橋串連兩岸! 如果之前已經有睇開我"英倫遊記"o既朋友, 都會記得我對"橋"o既情意結...兩年前離開倫敦前o既夏天, 除o左培養出晚晚食"哈根大師"o既習慣, 亦培養o左一個行橋o既習慣...好鍾意o係條泰晤士河係咁行, 由東行到西, 見橋過橋...沿途風光真係好優美, 同維多利亞港相比係另一種美!



亦因為o係巴黎最尾o個日一個人好"逍遙"咁遊覽, 無拘無束地鍾意行去邊就行去邊, 連map都唔睇胡亂咁行, 反而發現o左新大陸...就係發現巴黎同倫敦都係圍住兩岸o既景色最美, d museums呀, 羅浮宮呀, 國會呀, 鐵塔呀...n個景點呀...都係沿河而建, 夜晚著晒燈再加埋d觀光船o既燈光, 真係好靚...



我又係漫無目的咁沿住河行, 再見橋就過, 大大話話都橫過o左4,5條橋, 亦都叫做做o左遊客要做ｏ既ｏ野...去過o下d"名勝"! 一個人逍遙遊又係另一種樂趣...不過如果日日係咁可能都會有d悶o既...但一日半日真係好過癮, 有種好carefree的感覺!



唯一唔好就係言語不通...好唔鍾意o個種文盲+啞o既感覺! 去完法國覺得自己d英文都差o左, 因為永遠講唔一句完整o既句子! 如果唔係因為呢樣o野, 我驚我會愛上巴黎多過倫敦...事關d酒店平d又靚d, 搞到我籬o左o係酒店都唔願出街! 巴黎d路又易搵d, 通常沿住一條大路行, 見馬路就過, 見彎就轉, 地圖都唔洗睇! 頂多就算迷路咪跳入個metro度...好刺激, 好好玩...呢d唔知自己下一步去o左邊o既感覺, 好鬼死鍾意! 又係o個句: 好carefree!



今次成功地跳出metro亂行一輪搵到o既景點: bascilica...行完一輪斜路加公園再搵到間教堂...好有成功感! 其實呢個地方次次去法國都有o黎...大約知道個地理環境先搵到...都唔係咩偉大o既事蹟! 但我覺得係威就係威囉...hoho! 同埋唔知點解, 我硬係覺得"日落巴黎"音樂特輯有一幕o係呢度取景...有無人可以話我聽係咪呢?



今次仲有個得著就係之前次次都係跟人o黎法國, 巴黎個地圖我望都無望過, 邊個地方住處邊dud我完全唔知...去完今次"日落巴黎"之旅, 我大約都對巴黎每個地方o係邊有d印象...原來認識o左一個地方, 就會對佢更感興趣! tvb係時候重播哥哥o既"日落巴黎"特輯俾我睇喇!