H-E-J-N-O-M <=> 芒姐再現之...舊日的足跡+英倫遊記

芒姐再現網址: "http://hejnom.blogspot.com/"... 前身為"芒姐.diaryland.com"

星期一, 7月 28, 2003

7-28(mon) 律政新人王

暑假真係特別多好戲睇 (當然我係指電視劇, 唔係指電影啦…我一向睇電影都只當係一個聯誼活動, 多過真係好想好想去睇套戲)…之前o既“金牌冰人”都幾唔錯吓, 呢期o既“勁雞推介”, 當然係“律政新人王”啦!

呢套劇真係唔錯…cast幾好, 故事都唔錯, 成套劇都幾cutie添! 絕對唔係因為同法律界有關所以有趣, 相反就係因為雖然係講呢行, 但係超級唔寫實, 所以先有趣嘛! 呢套戲裏面o既法庭以外或以內o既戲, 都做得幾活, 幾出色!

尤其係Juno…真係演得唔錯呀 (呢排好投入地不停咁讚Juno…)...演得好活潑, 仲幾演活個死o靚仔角色添呀! o個日佢送個騎呢公仔俾Jessica (廖碧兒個角色), 仲要不停口咁講:“個公仔係咪~爆得意~呢?!”…好一句“爆得意~”! 唔知點解我覺得好搞笑喎…好時下o既年青人口吻囉!

另外, 阿林峰同胡杏兒都做得唔錯, 尤其林峰…真係幾生鬼呀! 胡杏兒個短髮亦都好有型…好過佢之前個長髮look好多! 另外兩位主角都做得唔錯, 不過個角色唔夠佢o地“出”囉!

另一套“打正旗號”o既暑期黃金檔 –“戀愛自由式”, 朋友們話開正我o個 “瓣”…青春劇嘛…話我一定鍾意睇喎!

我確係由細到大都最喜愛每年暑假o既青春劇…尤其係“校園劇”, 仲要係“輕輕鬆鬆鄧梓峰”o個隻, 我通常都會好buy! 不過今次o個d又絕不能同以前o既“淘氣双子星”, “不再少年時”, 又或者我最喜愛o既“浪族闊少爺”(當然唔少得唔係屬於我o地年代, 但本人十分鍾愛o既“IQ成熟時”啦) 相比…d人唔吸引唔在講, 最主要係本人年紀已經太大喇…睇住d細路做戲, 直頭有睇“閃電傳真機”(我知道已經轉o左名, 但係我睇兒童節目o既全盛時期, 係“閃電”嘛, 所以用番呢個名比較有感情!) o既感覺囉…雖然我到大個o左反而鍾意睇兒童節目!

橫顧全套劇o既主角, 好似都只係得“邪不能勝正”o既“燒正男”大過我o地 (仲要我係全力支持Juno o架嘛…“燒正男”都係行埋一邊啦); 其他o個d小妹妹直頭係睇住佢o地大咁滯…所以都真係唔會太大興趣去睇! 要同以前o個d精彩暑期青春劇比較…sorry! 真係無得比!