H-E-J-N-O-M <=> 芒姐再現之...舊日的足跡+英倫遊記

芒姐再現網址: "http://hejnom.blogspot.com/"... 前身為"芒姐.diaryland.com"

星期五, 9月 03, 2004

9-3(fri) 伏明霞

無線前幾晚食住奧運條水播o左個“180轉睇伏明霞”特輯…又幾好睇喎!

至少好睇過o個兩個香港孖寶凱旋榮歸o個個騎呢特輯…不過話時話, 呢個特輯就真係超級好笑…又姑姐煲湯, 又阿爸阿媽打波; 仲有李靜個阿媽口水多過茶, 講埋d好失禮o既o野同埋著o左件娘得可憐o既“全家福”t-shirt (相裏面李靜個細佬仲要舉起v字手勢…救命呀!)…真係好失禮!

講番伏明霞…佢的確係中國奧運o既一個傳奇人物, o係跳水界亦可謂“前無古人後無來者”! 我都好奇怪點解奧運之前o個幾個月播o既特輯“我們的冠軍”無講佢? 畢竟佢都係香港人心目中最出名o既中國奧運代表, 仲要佢依家身處香港, 搵佢做訪問應該容易好多呀! 我以為唔通真係因為佢無啦啦走o黎香港嫁個有錢阿伯, 令人覺得佢cheap晒?!

原來唔係, 係要特登整個特輯專係for佢一個人…咁都o岩o既…睇o下依家佢o係香港o既生活點滴, 都幾有趣!

由佢幾歲開始練跳水到佢13歲第一次拿世界冠軍, 再到佢退役入清華讀大學, 跟住復出參加2000年悉尼奧運, 再無啦啦同松叔叔結婚生女再o黎埋香港住…呢個特輯全部都有晒!

仲有一d從未暴光o既片段, 例如佢個一d都唔可愛仲帶點呆滯, 似松叔叔多過似佢o既女返幼稚園o既片段, 仲有佢一家3口去沙灘玩o既片段, 同埋佢用$170買3個木瓜o既片段…都一一呈現眼前!

簡直有種“這麼近那麼遠”o既感覺! 昔日o既世界冠軍, 依家就住o係我o地附近…感覺有d奇怪! 彷彿我聽日行出街就可能有機會同佢相遇咁樣!

點解我當年好欣賞佢o既時候佢又唔o係香港呢?! 到我依家覺得佢都有d cheap o既時候, 佢又變得同我o地距離好近! 佢仲會成日去我o地昔日o既蒲點-跑馬地買[食送]…雖然我依家唔係特別喜歡佢…但我打算去跑馬地街市撞o下佢…睇o下佢買100蚊豬肉同埋170蚊木瓜都好呀!

不過講真, 可能正如佢所講, 依家o既佢仲開心過以前作為世界冠軍o既佢, 因為以前每日活o係競爭之中, 又真係幾辛苦o既! 咁佢嫁松叔叔, 可能亦都總比嫁死o靚仔好o既! 仲可以住洋樓養蕃狗, 都真係人人嚮往o既生活…跳水跳得咁辛苦做咩鬼呀?!

o係個特輯睇番佢咁多年o黎o既訓練同比賽片段, 好似真係返番去十幾年前咁…佢果然係陪住我o地成長o既一個傳奇人物!

佢跳水o既片段, 真係十分之精彩; 相比起依家d中國代表, 即使係郭晶晶或者田亮呢d現役世界冠軍…佢都仍然係有過之而無不及! 動作清脆又幽美…抵佢贏完一次又一次!

而o係佢個訪問中, 講到成日俾教練將佢同郭晶晶比較, 好明顯佢兩個都有些少心病 (好似譚校長同哥哥咁, 即使佢兩個本身無唔o岩, 俾人講得多都講到唔多妥啦!)…所以上屆郭晶晶本來一直o係其他賽事壓倒伏明霞, 但係o係奧運又再次不敵佢, 都顯得非常心有不甘! 今年終於俾佢贏番次, 應該了o左個心願啦!

睇番d片段, 仲勾起o左92年暑假o既開心回憶…開心在咩都唔洗做…好relax呀嘛! 一邊放暑假一邊睇奧運, 簡直係人生一大樂事! 當時又係深夜先直播奧運, 我仲會一邊睇一邊叮番熱d小食…真係超級美味!

睇跳水仲順手有巴塞隆拿o既高空超級靚景睇 (因為個跳水池好似o係戶外o既)…好回味呀! 有得放暑假o既人真開心! 我可唔可以讀番中學呀?!