H-E-J-N-O-M <=> 芒姐再現之...舊日的足跡+英倫遊記

芒姐再現網址: "http://hejnom.blogspot.com/"... 前身為"芒姐.diaryland.com"

星期日, 1月 18, 2004

1-18(sun) 好戲…在後頭

依家晚晚為o左追“香江花月夜”搞到成兩點先[目訓]…對一個病人o黎講, 實在唔係好應該! 但係無法啦, 睇開又無理由唔睇, 同埋又確係比我想像 (記憶) 中好睇! 劇情老土得o黎又幾寫實, 同埋梅姐個歌女角色就簡直係做番佢自己! 不過, 又係d慘到無影o既苦情劇, o係呢d時勢其實唔係咁適合睇! 我覺得阿景黛音真係幾靚囉, 好秀氣o個隻…但係只係o個一期成日見到佢, 之後就影都無埋…係嫁o左人收山定點呢?! 好想知佢依家變成點? 不過佢咁樣o係最美麗o既時刻引退可能真係最明智o既, 至少大家都會留低一個最美好印象!

至於蔣麗萍…耐唔耐都會見到佢! 最近期一次係o係11月林敏怡林敏聰演唱會聽佢出番o黎唱幾隻歌仔…都仍然幾好聽! 係個人肥o左d囉, 不過成40幾歲, 仲生完n個仔女, 算keep得幾好o架喇!

唯一最慨嘆o既 (唔係講梅姐) 係李國麟囉…曾幾何時佢都擔過幾套劇做第2男主角, 而當年佢個樣都唔差呀, 幾青靚白淨…但唔知點解佢無幾耐就dup晒, 仲淪落到要做萬國舅/十一哥…同盧苑茵配成一對添! 真係歲月不“蹺”人!

成套戲跟本就係“儂本多情” o既翻版, 無論人物, 情節同橋段都有好多相似…最搞笑係夜晚轉台去睇亞視“子是故人來”, 居然見到當年“儂本多情”o既女主角商天娥化晒老裝扮80歲阿婆! 呢套“子是故人來”又係搞笑o個批…o個d時空交錯, 個老豆去到未來見到仲老過自己o既仔, 再一齊時光倒流去見返少年時代o既阿爺…d咁騎呢o既劇情, 我就最鍾意喇…而亞視亦都最拿手去拍 (好似殭屍系列咁)!

今個禮拜日tvb播“緣份”呀, 大家如果未睇過記住睇o下…畢竟都係經典中o既經典, 好唔好睇係另一回事! 我上次睇完“緣份”vcd寫o個篇”review”, 係未知梅姐有事o既時候…唔知依家再睇, 會唔會又有另一番感受呢?