1-16(fri) 大迷信, 大迷信, 大迷信1993/2003?!

o個日睇勁歌, 一開始o個part例牌又有o個d回顧過去一年去世歌星o既環節…我同阿媽講, 2003年真係好邪, 有咁多人死…跟住我諗o下諗o下, 記得o係十年前o既1993年度頒獎禮上, 亦都係有好大part o既時間用o左o黎做呢d懷緬節目…跟住諗起原來家駒同埋陳百強都係o個年死o既…好恐怖呀!

原來邪o既唔只係2003年, 而係有3字尾o既年…好…邪…呀…! 對唔住, 我知我唔應該o係呢度導人迷信o既…但我的確覺得好邪囉!

之後o個晚睇梅姐個特輯, 今次只係剪晒d經典片段, 我諗住應該無o個d慘情位啦, 於是o係最尾o個part又批o左個萍果o黎食! 點知唔批由自可, 一批又出事喇! 之前明明都仲係播緊d經典片段, 點知無啦啦o係我一咬落個萍果o個一下, 佢居然又剪番當日o係殯儀館外d人去公祭o既片段, 仲一邊播住“夕陽之歌”, 同埋臨尾再影埋佢最後o個個演唱會o既回眸“拜拜”位…真係邪到呀…! 以為今次食萍果一定萬無一失啦, 點知真係又一食親萍果就“lai” o野, 播埋d咁慘情o既片段, 真係差d連個萍果都嘔埋出o黎! 以後食萍果都要拜過神先呀真係!

其實星期日晚我終於真係有經過殯儀館, 不過當然係過o左公祭時間之後, 我亦都無打算要排隊入去…只係順路 (唔排除有少少特登成份) 經過睇o下! 不過當時仍然有好多記者, 又塞滿人, 所以都無機會走近殯儀館去睇o下周圍環境!

經過o既時候當然仲有大批記者, 更有一大jar人群o係殯儀館對面o個條路睇明星…因為全部明星都要經o個段路出入! 不過當日去公祭o既人其實俾我想像中少…本來佢o地都預計有過萬人, 但最終都係得6千倒…好似仲少過哥哥o個次!

不過講真, 我真係覺得梅姐比哥哥更加值得大家敬仰…佢對生命o個份堅持同埋對人對事o個種無私o既付出…真係好值得所有香港人去學習囉! 睇住佢部靈車駛出o既一刻, 相信好多人都會流下眼淚!

除o左呢一part, 我諗我覺得最慘o個個位就係o係火葬場d歌迷不停咁唱佢o地改晒詞o既“情歸何處”送俾梅姐, 仲叫到聲嘶力竭咁, 然後d徒弟同埋親人全部都o係度飲泣o既場面…最抵死係亞視新聞最尾仲要影住火葬場個煙囪, 話一代樂壇天后最終都化作一縷煙…當你想像到好地地一個人最終都煙消雲散, 變成一團煙o既情景…你話幾咁sad呀!

另一個我覺得最慘o既位, 就係喪禮上叫“蓋棺” o既時候, 然後d人個個依依不捨, 心知永遠都無可能再望見呢個“人” o個種眼神+表情, 真係叫人好心傷!

呢排聽得最多o既歌, 居然係靈堂內不停咁播住o既“觀自在菩薩…” (唔知係咪咁寫), 因為呢幾日分別睇o左好多不同台o既“永別梅姐”特輯, 而每次一播靈堂畫面, 亦都會播埋呢隻歌!

仲有, 我仍然唔明, 譚耀文係咪真係同佢o地反晒面呢? 佢明明真係梅姐o既徒弟, 點解訃聞無出佢個名, 而佢亦都好似全程都無出現過o係梅姐o既喪禮咁?!

呢兩日同一個唔o係香港o既朋友傾開梅姐件事, 佢講o左一句令我覺得好o岩o既o野, 好“警世”呀…! 佢話大家唔開心當然有啦, 畢竟佢同哥哥都係陪住我o地成長o既一個印證等等…, 但係佢o地兩個o係一年之內o既相繼離去, 就彷彿好似叫我o地同80年代講聲bye bye, 正式為o個個我o地都最懷念o既時代劃上句號, 重新投入一個新世代, 新生活! 我聽完之後覺得真係好o岩…2003年發生o既事雖然係好唔如意, 好難接受, 但係人點都要繼續生活落去…應該o係新o既一年, 有一個好o既開始!