H-E-J-N-O-M <=> 芒姐再現之...舊日的足跡+英倫遊記

芒姐再現網址: "http://hejnom.blogspot.com/"... 前身為"芒姐.diaryland.com"

星期二, 4月 08, 2003

4-8(tues) SALUTE TO A LEGEND (5)

呢幾日o既雨落得好大, 彷彿個天都為呢位一代巨星o既離去而痛哭!

今日睇新聞, 見到由尋晚開始, 兩日夾埋已經有上萬人士為送哥哥最後一程而冒雨o係香港殯儀館外等候…可以話係我見過最壯觀場面之一! 尤其係睇晚間新聞臨尾剪輯o左佢出殯o既片段, 再配上佢o既“風繼續吹…不忍遠離…”…更添幾分傷感! 其實, 香港o既人真係好長情, 可以為o左送自己o既偶像最後一程而企足一晚, 淋足一晚雨…邊個話“香港人情紙咁薄”?!

最落力都係亞視, 居然安排全程直播哥哥o既出殯過程; 但係因為傳媒唔可以入到靈堂影, 所以佢o地只能由11點未到就影住殯儀館出面, 影到12點半靈車駛出o既一刻! 最難為係陳芷菁, 要坐o係廠度個幾鐘做主持, 仲要一路留意住d賓客幾時行出o黎, 架靈車幾時駛出o黎…又要不停咁諗o野出o黎講, 避免dead air…真係戥佢慘! 呢d咁勞心勞力o既現場製作, 都係唔o岩無咩資源o既亞視o架喇! 不過可能佢o地諗住橫掂新聞部都派o左人一路o係度standby, 咁就順手直播埋, 唔好o徙嘛…所以居然要繆美詩做埋呢個“半娛樂”節目囉!

o係陳芷菁好辛苦咁勁搵o野講o黎拖長個節目o既時候, 不斷都有播番哥哥廿年o黎o係亞視o既片段. 睇o左少少80年代尾o既“今夜不設防”訪問片段, o個時o既哥哥仲好囂好寸; 相比起97年o既“星夜傾情”, 好明顯佢近年o黎收o左好多火, 內斂o左好多!

前幾日咁o岩聽電台, 個dj又係講緊哥哥, 介紹緊佢隻“儂本多情”…佢話記得當年隻歌根本唔係叫呢個名, 而係有一個好有詩意o既名…“一串夢”!“情愛…就好像一串夢, 夢醒了一切亦空…”! 個dj話相信講起呢套劇, 無人會唔記得leslie個殺死人o既玩世不恭不?look, 更加無人會唔記得呢套劇o既最經典場面 –“掟枕頭飛羽毛” 一幕 (I agree!)!

但係佢話最唔明係點解會搵商天娥做女主角, 仲要加句話佢咁講絕對無惡意 (咁反而顯得更核突, 更有惡意!)…咁我都認同商天娥係唔夠靚又唔夠紅去做一個咁“癲倒眾生” o既角色o既, 仲有d baby fat添…但係橫顧番o個個年代o既無線, 我又真係諗唔到一個比佢更適合做呢個自信而倔強角色o既花旦喎…唔通搵阿君如咩?! (雖然佢係劇中o既一大配角, 仲成日提番話無理由當時由商天娥做主角而唔係佢!) 有時唔係要靚先得o既, 我覺得商天娥某程度上幾有佢o既style呀! 不過o係套度?面, 就當然會俾型仔到痺o既leslie比下去…佢個40年代o既公子哥兒look, 只得一個字 - 型! 正如佢自己曾經講過, o個個年代真係無人比佢著白色西裝著得更型仔!

相信我身邊o既朋友都不只一次聽過我推介呢套劇, 因為真係好正…不過只限於頭5集! 之後o個5集就另一回事, 好騎呢, 好慘…唔知點講! 可能其實後5集先係呢套劇o既中心主旨, 但係我真係唔鍾意睇呢d戰亂, 爾虞我詐o既慘戲! 我細個o個時對呢套戲o既印象明明只限於俊男美女, 遊戲人間, 靚人靚景等o架嘛…我仲以為到佢o地結婚就已經係ending…點知原來呢一part先係一個“開始”…o係98年第一次認真咁睇番呢套戲o既重播…當堂晴天霹靂! 好記得當時就快考a-level, 通常考試期間會覺得d電視劇特別好睇…咁就當然更落力咁去追戲啦! 唔知點解…每逢考試o既時候, 總會有好多好戲重播, 96年會考就追“楚留番之蝙蝠傳奇”; 到98年高考就有呢套喇…所以都特別深刻!

最後都要講番哥哥…雖然我十分唔認同佢今次o既做法…佢就去得瀟灑轟烈 (如果佢真係因為抑鬱症而不由自主咁做出呢個行為, 咁我唯有話係“社會o既錯”囉!), 但係卻為佢身邊o既人, 甚至全香港o既人, 帶o黎無限傷痛; 不過無可否認, o係香港呢20年o既樂壇, 張國榮真係前無古人, 後無來者!