6-4(sat) 美麗傳說2之星願 (1)

終於都有機會講o下呢套我追o左3個禮拜, 推介o左俾至少30個人o既亞視重頭劇! 其實呢套劇真係應該講o左好耐, 因為依家播到一半先講, 大家就算開始睇都會miss o左好多…不過唔緊要, 我相信亞視應該會o係不久o既將來又重播o卦?!

我覺得即使係對亞視有偏見o既朋友, 都應該試o下睇一兩集, 因為佢基本上同亞視平時自已製作o既劇集有d唔同 (除o左d演員大致上都係平時睇亞視見慣o既面孔再加幾個外援)…最顯著o既分別就係呢套戲節奏勁明快囉…完全係快到你miss一集, 劇情就好似已經過o左一年咁!

我覺得王晶果然係有d料到, d人成日話佢拍埋d電影係“屎尿屁”, 其實佢都唔知幾有腦…今次呢d娛樂圈爆料式劇集, 完全開正佢o個瓣, 正如佢自己o係製作特輯所講, 無人比佢更有資格拍呢種戲, 因為佢本身已經見證o左呢廿年o黎娛樂圈o既變化, 同埋佢呢套戲所提及o既娛圈80年代經典巨星o既誕生+起跌…好多娛圈秘聞, 由佢爆出o黎的確係更加抵死! 仲要係好de-till, 咩細節都有, 你簡直係估佢唔到囉!

我直頭覺得自己o係度睇緊一套documentary, 廿年娛圈秘史咁…即刻想去摷番d舊雜誌o黎溫o下歷史先睇呢套戲…咁先顯得我睇得幾咁認真!





http://www.hkatv.com/drama/05/dreamdesire2/


依家已經無啦啦做到90年代喇, d主角o既髮型同裝扮都變晒, 節奏明快到我有d估佢唔到 (雖然偶然都有d悶位)…真係同其他亞視劇好唔同! 同埋我推介俾10個人, 有9個半都話好睇 (所以依家有好多朋友同我一齊discuss劇情, 真係高興!)…大家有時間真係不妨睇o下, 尤其係一眾電視迷或者好似我呢d 80年代迷, 唔睇簡直係一大損失…而我唔o係呢度推介俾大家, 我就簡直係對唔住我o既所有讀者!

我覺得呢套戲完全係for我o地呢d成長於80年代o既人…只要你當年有得閒睇o下電視, 睇o下報紙, 都總會對劇中提及o既事情略有所聞, 繼而發出會心微笑…因為某d位真係拍得幾抵死o下!

更加不得不佩服王晶改戲名o既功夫, 抵死到痺…咩“少年警察” (新?師兄), “痴心扣” (胭脂扣), “有緣” (緣份),“咖喱魚旦” (咖喱辣椒), “花心蘿蔔” (花心大丈夫) “阿雞正傳”(阿飛正傳), “金粉綠葉” (金枝玉葉), “地獄變” (無間道) 等等…大家一聽個戲名就已經知道佢係講緊邊套戲…真係好抵死!

(太多o野要講, 下期續)