11-19(tues)“Happy Birthday Yeah Yeah, 齊齊賀銀禧LU!”…10年前的宣傳歌曲…咁就35周年啦!

今日又係一年一度o既tvb台慶, 熟悉我o既人都知道, 台慶對我o黎講基乎緊要過自己生日; 今年仲要係第35年, 咁大日子, 又點可以錯過呢! 好彩各方好友已答應幫我錄影, 好等我唔會miss o左呢件盛事, 真係唔該晒!

如果o係香港, 我一定會推晒所有節目, 乖乖留o係屋企睇現場直播…你可能會覺得我好無聊, 係呀, 我係咁o架喎! 雖然依家唔可以安坐家中睇現場直播, 我都有每日留意o下報紙同埋tvb.com o既報導, 唔會俾自己太out!

D表演環節就冇咩好discuss, 我諗都ok o既! 其實大家柴娃娃開心o下咪算囉, 睇o下d趣劇呀, “立立亂”o既表演呀, 總好過俾d一路睇一路戥佢驚o既忘命表演俾我睇…賀壽o者, 唔洗搵命博嘛?! 好似當年阿姐同N個 “俊男”表演o既熱咖啡+迷人pink lady環節, 咪既有娛樂性, 又唔洗得個驚字, 仲等大家茶餘飯後多o左好多話題…笑到依家!

反而好關心邊個拿o個d最佳男女主角…雖然明知係“分豬肉”, 但要知道分豬肉都係一門藝術, 要分得好好睇睇更加係唔容易! 我同d同學仔o係呢邊都有discuss過o下今年邊個會有機會, 就等我o係未知賽果前, 作個私人心水選擇+預測…

1) 女主角: 蔡少芬 (個人心水+估計都係佢, 因為我都幾鍾意睇“洛神”, 雖然裏面有d情節+佢o既演繹, 都有d令我吃不消…不過overall, 呢套戲係hit o既, 仲要佢一個人擔咁重戲, 唔俾佢拿, 唔通真係俾阿肥姐咩? btw, 我完全唔明肥姐o既“我要fit一fit” 為咩可以成為大熱? 完全9唔撘8!)

2) 男主角: 羅嘉良 or 馬浚偉 (本來陳豪呢期好似人氣爆燈, 但佢又應該未夠班攞男主角o既, 頂多係10大受歡迎角色或躍進男演員. 克勤作為“無線之子”, 加上“法網依人”大收, 本來都有d機會, 不過台慶最佳男主角唔俾自己d藝員而俾個歌星, 好似有d講唔通! 佢都係留番攞“最受歡迎男歌星”啦…哈哈! 至於阿撈家, 個人對“流金歲月” 呢種恩賜情仇o既長劇冇咩好感, 由萬子年代已如是, 所以今次連劇情都冇咩follow; 不過佢作為無線最當家小生, 套劇又o岩o岩播完, 相信會俾番d面佢! 個人會鍾意馬浚偉攞多d, 起碼比起撈家新鮮…唔記得佢之前攞過幾多次…而且無線呢期都力捧緊馬仔, 再加上自從“勇往直前” 之後, 我都幾鍾意睇佢同蔡少芬, 所以我睇高佢一線!)

3) 躍進女演員: 胡杏兒 or 葉璇 (估計胡杏兒應該機會大d, 因為“流金” o岩o岩播完, 而且一向做弱智角色都出d, 雖然我覺得佢平時做d正常角色都有d似低b! 個人prefer葉璇多d, 好鍾意睇佢同林峰做o既“再生緣”, 真係做得唔錯…尤其佢個男裝扮相靚過佢做番女仔好多, 演技亦好過胡杏兒! 不過兩個都係力捧緊, 叮噹碼頭, 唔知點估…加埋個人喜好, 我撐葉璇!)

4) 躍進男演員: 林峰 (唔記得陳豪有冇份候選, 如果有, 佢o既機會大D! 至林峰, 雖然我覺得佢似少年魯振順多過少年古天樂; 但無可否認, 佢由一出道已演得唔錯, 由“美味情緣”到“尋秦記” 再到“再生緣”, 都演得好好…所以我buy佢; 仲有, 利孝和夫人都buy佢嘛!)

5) 最佳拍檔(戲劇) : 羅嘉良 & 宣萱 (一哥一姐嘛, 點都要俾番個妬趏地, 尤其o岩o岩播完“流金”, 雖然收視應該唔會太好, 但點都深入民心! 仲有佢o地d騎呢緋聞造勢, 應該俾佢o地啦…尤其如果撈家攞唔到男主角. 就更加一定要俾佢o地…唔係就調轉蔡少芬&馬浚偉, 但咁樣機會應該微d!)

6) 最佳拍檔(非戲劇): 獎門人 (冇得講, 年年都係佢o地啦! 由我f5做到依家, 如果一個細路由一出世開始睇, 依家都7歲啦!)

一輪咀咁講完, 好暢快! 寫得暢順過平時的日記好多o添, 讀書都無咁落力…唔經唔覺, 佢然寫到3點, 本來有d眼“瞓”, 依家居然精神晒! 真係覺得自己有d無聊, 但寫日記唔係寫得開心最緊要咩? 呢篇日記…我好鍾意! 打o左咁多字, 唔洗一個鐘, 快過我o係做記者時打一篇幾百字o既稿好多! 我諗…我真係應該去寫娛樂版, 應該會幾如魚得水…或者自己去整本網上娛樂雜誌, 娛人娛己!

寫完呢篇日記, 居然有當年寫完“一筆OUT消” 篇稿o既滿足感, 正!!! I LOVE TVB! 哈!