H-E-J-N-O-M <=> 芒姐再現之...舊日的足跡+英倫遊記

芒姐再現網址: "http://hejnom.blogspot.com/"... 前身為"芒姐.diaryland.com"

星期六, 12月 14, 2002

12-14(sat) 歡樂滿東華2002

話咁快就到o左12月14日, 除o左係一年一度o既 “歡樂滿東華” 大日子之外, 仲係我暫別倫敦, 返香港同家人朋友團聚o既大喜日子!

“歡樂滿東華” 方面, 本來如果我book到早一日機票, 直頭可以返o黎睇live添…因為其實我鍾意睇“歡樂滿東華”o既最大原因, 就係好喜愛o個種“夜媽媽” 做直播節目o既現場氣氛同埋眾志成城o既感覺…所以雖然佢個節目本身愈來愈悶, 但係我仍然每年捧場! 依家睇唔到live, 唯有叫好好人o既同學仔幫我錄啦, 唔該晒!

而另外一件大事, 當然就係我o既“回歸” 啦…今次係我第一次自己撘飛機…坦白講, 係有D騰雞o既…真係未試過嘛!

今朝一早8:00就起身準備, 因為我間好有“人情味” o既hall居然要我o地10:00前完全vacate間房+sign out…但我班機係夜晚9點幾喎, 真係唔該晒佢!

前幾日已經開始將D o野搬去其他同學o既hall度, 尋日又自己將件最大o既行李拖落留下個trunk room, 搬來搬去, 已經搞到一頭煙! 今日又要晨早流流將D要用到最後一刻o既物品pack好再拖落trunk room! 但係今日超多人sign out, 一片混亂…加上不停將d大包細包拖來拖去, 搬上搬落…終於搞到11:00都未整完! 搞掂之後, 我已經成身濕晒…原來最佳o既“消脂”方法, 絶對係搬屋…我居然可以係咁凍o既天氣之下出到成身汗! 不過見到自己可以o係一日裏面一手一腳咁將間佈滿雜物o既房變成一間“吉房”, 又真係好有滿足感o既!

我諗我o黎London學到最有用o既o野, 絶對唔係學業上o既知識, 而係搬屋o既技倆…仲要係一手一腳咁自己搞掂…以前o既我…一定唔得! 依家咁兩個月要搬一次, 相信我o係香港o既廿年o黎夾埋都冇咁多! 我諗我返香港可以搞番間“人人搬運公司”… “人人搬屋好…”! 依家我已經有一技旁生…唔洗多謝“職業訓練局”, 而係要多謝 London U!

之後再 “一揪二lun”咁搬埋D o野過去朋友仔間hall度…o個一刻, 我已經雙手乏力…但我唔可以咁快就“lum” o既…因為我仲有漫長o既路程去Heathrow! 本來以為拖一個喼加兩個大袋落tube都唔會好難o既, 因為Russel Square個tube station又咁近我間hall, 加上一上Piccadilly Line架車就唔洗轉車直踩Heathrow…點知, 只係拖個喼去tube station, 就已經攞o左我條命!

一向都係用豆腐做o既我, 不嬲都冇咩力…點知原來個喼俾我裝o下裝o下都唔輕, 再加上佢個轆又唔係太好, 而我又仲要側邊揹住個電腦加其他手提行李; 所以o個段平時又係5分鐘都唔洗o既路程, 我用o左10分鐘…仲要, 中途又係全線行李“totally collapsed” o左一次…好彩部LAPTOP冇事!

之後拉個喼落tube station仲大劑…撘完“車立” 居然有一段樓梯…嘩, 我完全係出盡“9牛2虎之力” 都抬唔郁佢…顧得個喼又顧唔到個袋, 狼狽到極點 (此時我居然仲聽緊MD, 咁o岩仲播緊“容易受傷的女人”…想點呀…攞景呀?!)…最後唯有將個喼半抬半“轆” 落樓梯…隻手此時仲“騎呢” 地乾到流血添! 但係, 原來好戲在後頭…最辛苦o個part仲未到…到“please mind the platform gap” o個個位就真係“lai” o野啦…要o係好趕急o既關頭將個喼“的”起再搬過個gap…情急之下用隻腳托一托佢…d力一卸之下, 條腿好似揪筋咁囉…哎吔!

有o左之前搬o野方面o既經驗, 今次o係預時間方面醒o左d啦…因為要用一種自己未用過o既方法去一個自己未試過去o既地方, 所以預鬆o左好多…4點我就出發喇! 加埋我d拉o下停o下o既時間, 都只係用o左個半鐘就由hall去到機場Terminal 4! 此時我仲未有得check in, 唯有推埋架行李車去COSTA坐o下囉!

就係咁, 我就o係冇買任何o野飲或食之下, 坐o左o係人地張枱超過一個鐘 (仍然坐-ing), 仲好有型地攞部laptop出o黎一邊打o野一邊聽MD…等d人仲以為我做緊d咩“大茶飯”…總之係“型”囉 (自己一廂情願地認為並一邊沾沾自喜地暗笑緊)…哈哈! 最鍾意就係o個種活o係自己o既世界唔理人點睇o既感覺!

之後發生o既事, 下一篇再同大家講!