7-3(sun) 美麗傳說2之星願…結局篇

有d朋友話點解一路都唔見我寫埋“美麗傳說2”o既結局篇…原因只得一個: 因為我未睇!

上個禮拜五唔知又撞咩邪, 夜晚d電視節目全部錄唔到…搞到我連最緊要o既“美麗傳說2”大結局都睇唔到…咁即係算點喎? 好彩最後都發現有朋友有錄! 如果唔係, 我都唔知點算?! 須知道睇唔到一套你追開o既電視節目係好慘…如果追o左30集而睇唔到個大結局…仲慘!

假期終於有時間睇番個大結局…結論係: 好悶! 簡直係全劇節奏最慢o既一集…同平時明快o既節奏完全背道而馳! 雖然通常d大結局都係全劇最悶o既一集, 呢套亦都唔例外…但係睇o左30集, 無理由唔睇埋個結局o架嘛?!

結局篇最主要都係講梅姐患病直至“最後個唱”直至死o既一段…拍得超逼真, 超似, 超有共鳴囉!

估唔到俞可欣出書o個件事又有, 連華仔陪阿梅覆診都有…都好detailed嚇…仲要全部都係呢幾年發生o既事, 非常歷歷在目…好似睇番d真o既片段咁樣!

講梅姐臨死前拍廣告以日本look示人…嘩! o個個戴假髮日本和服look真係似到呀…好驚! 直頭好似見鬼咁! 唔怪得知連陳煒都話自從做呢個角色之後, 都有d邪o野發生!

最最最似o既一段當然係梅姐個“最後個唱”啦…同埋講佢戴住冷帽開記招向傳媒宣佈患癌消息, 跟住有一班藝人朋友企o係佢後面支援佢, 之後仲要逐個攬一下o個場亦都非常似…咁細微o既o野都抄足…個場景好似, d細節好似, 連梅姐d假留海都好似…直頭睇到毛管棟o左一棟!



個“最後個唱”就更加唔洗講, 成個舞臺setting都抄足…好落本, 好落力! 尤其堂樓梯…真係抄得好有神髓! 當然更有神髓o既就係陳煒個look同埋d服裝啦…個假髮同埋婚紗裝…似得好可怕呀! 跟住無啦啦又照講梅姐演唱會時對d觀眾講o既: “我都愛你呀!”…連腔口都似埋…洗唔洗咁似呀?! 仲要連“夕陽之歌”都唱埋, 再一邊唱一邊行上條樓梯, 然後唱到最後一句, 回頭望再以虛弱+沙啞o既聲線講埋o個句“拜拜”! 嘩…大佬…每一個細節都扮得太似喇! 直頭好似睇番梅姐生平回顧特輯…我上年o係呢度講梅姐逝世時, 咪話每次播番佢演唱會尾段唱“夕陽之歌”, 同埋最後o個句“拜拜”o個段…都覺得超難受, 超心o翕…點知佢真係可以咁真實咁重演一次出o黎…好可怕!

我本來睇預告見佢o係個舞臺度?低o左, 以為劇情真係會講佢死o係舞臺…咁咪仲震撼…事關梅姐一向都係話“叫我死o係醫院, 我寧願死o係舞臺!”…所以我以為王晶真係會改少少劇情, 講雷姐真係“死o係舞臺”…咁咪仲型!

睇完呢套戲真係又再次勾起梅姐o既坎坷身世…睇到佢有幾咁愛華仔但華仔又唔愛佢, 又話要“嫁俾舞臺”…真係好慘…好心o翕!



不得不讚陳煒今次d戲真係進步o左好多…扮阿梅扮得好神似…除o左個樣似, 造型都好似, 連d戲都好好…抵佢做亞視一姐! 唔知o係劇中扮梅姐唱歌係咪佢自己唱番o既呢, 有d似佢把聲但又唔似得曬, 如果真係煒哥自己唱番, 業餘o黎講都算唱得幾好…令我對佢更加另眼相看! 可惜黃浩然交唔到戲俾佢…o徙曬! 終於明白點解杜琪?力捧o左佢咁多年都紅唔起…唔好講佢扮華仔連一d神髓都扮唔到, 即使本身做戲都麻麻, 同埋講o野有d一舊舊…呢d係演員o既大忌!



連我推介俾d朋友睇佢o地都話陳煒做得好似, 反而陳法蓉就只係似做番陳法蓉…不過大結局o個集講呀雷死o個場, 陳法蓉真係口水鼻涕直流…我直頭見到一整條鼻涕…又幾好戲喎!

又要講多次, 王晶改戲名真係改得好抵死…臨尾o個幾集o既“四面楚歌” , 一聽就知佢想講“十面埋伏”…仲係好啜核, 一聽就associate到o個隻! 不過我最欣賞o既始終都係影射“愛君如夢”o既“唔得閒發夢”!

可惜我點幫呢套戲宣傳 (包括o係呢度勁講同埋親身向無數人推介), 都唔到佢拉高佢個收視…只得5點…好慘烈! 唔好話煒哥好失望呀…我本人都好失望! 如果係o係無線播, 呢套咁有水準o既戲一早hit o左啦, 陳煒都應該憑呢個角色紅o左好耐! 可惜大部份人都對亞視有偏見…慣性收視真係無o野好講…應該學我當年o既“偶像”尹天照話齋: 試o下欣賞亞視o既誠意嘛!

畢竟當年無線o既“娛樂插班生”都可以掀起熱潮, 連做o左茄喱啡十幾年, 個樣十分“二打六”o既林家棟都紅得起, 簡直係奇蹟…但o個套戲其實只係抄d藝人o既形象或者用佢地個名, 並唔係好似呢套咁仔細地講曬80年代娛樂圈紅人o既傳奇故事! 我真係覺得呢套係一套好有誠意+水準o既製作…希望亞視快d重播啦, 事關每一集都好好睇! 尤其頭幾集因為同無線o既“學警雄心”打對台, 搞到我miss o左, 希望好快可以由頭睇多次!