12-23(tues) 2003十大中文金曲 (下)

(...cont.)

今次頒獎禮o既大贏家, 除o左係克勤之外, 就係一班出道無耐o既小朋友…容祖兒啦 (“我的驕傲”居然可以得到“全球華人至尊金曲”…好明顯今年係無hit歌! 呢首真係唔係特別好聽, 即使佢自己本身今年都有其他歌好似好聽d囉!), Twins啦…仲有張敬軒! 當晚幾乎係張敬軒演唱會, 俾佢唱足兩首歌…其他人通常都係得o個半首之嘛…以前港台好似有得唱晒成首o架? 不過作為一個新人, 佢又真係唱得幾好o既…抵佢咁多獎攞!

但係今年俾o個個“好勝Gigi”攞到咁多獎, 仲懶係威咁…真係好克人憎囉! 自從“奪面双琪”事件之後, 都真係覺得佢好鬼cheap! 即使“pit”開呢單o野, 佢o係歌唱方面o既造詣亦都真係唔多掂, 再加上佢擺出個款都好鬼克人憎…咁我唔排除係有d bias成份o既, 但呢個世界又有邊個係完全唔bias o架?!

比較有趣o既係4年前o係同一個場地, 我睇o左一個商台o既“六神合體演唱會”, 係當年商台特別挑選o左6位所謂比較有潛質o既“新星”, 包括Eason, 千嬅, 盧巧金, 梁炳, 謝檸檬同埋好勝Gigi, 幫佢o地搞演唱會…o個期就係o岩o岩爆發完“奪面双琪”事件之後, 所以“好勝Gigi”無論去到邊度都俾人噓到7彩; 就算大合唱時, 一到佢唱d人就係咁噓…雖然我係鄙視佢, 但都覺得洗唔洗去到咁盡呀? 當時我以為佢就係咁會o係呢個樂壇玩完…點知4年後o係同一個場地, 佢居然可以又再得戚起o黎…世事真係無絕對!

反而許志安唔知點解今年咁慘, 連一首金曲都拿唔到?! 佢今年d歌的確唔係特別好, 但亦唔係特別差啫…以佢o既地位同人氣, 無理由咩獎都唔俾佢呀?! 唔通佢得罪o左淑梅姐?

當然港台一向力撐o既華仔, 雖然人唔到, 但都照樣會頒d獎俾佢, 仲俾佢d fans上台代佢唱晒成隻“人善天不欺”(華仔又確係識做o既, 就算唔o黎攞獎, 都唔會令d fans“失望而回”), 真係同人唔同命! 可惜今年港台唔知點解忽然間提早咁多搞個頒獎禮, 無得做壓軸頒“傳媒大獎”, 唔可以再一如往年咁“造”個“傳媒大獎”俾阿華仔!

其實我當晚成場都唔可以真正靜靜地咁坐低聽歌 (除o左唱80年代歌紀念林振強o個part), 事關“好好彩”咁坐o左o係堆英皇fans隔離, 嘩… d“小朋友”成場都嘈到爆…一聽到佢o地d偶像個名已經好齊咁即刻企晒起身尖叫…Twins呀, Joey呀, Yumiko呀, Boyz呀, 仲有阿Deep添 (超騎呢o既一個英文名, 英皇下年應該捧多個“Shallow”!); 而當佢o地得獎o既時候, 更加要叫晒口號咁吶喊+和唱…直頭令我諗起中學時代o既Sports Day, 一到自己個House攞獎或有代表出o黎比賽, 就要跟住個House Captain一齊叫破喉嚨…真係唔知點解咁落力?!