6-22(tues) 愛上女主播

呢排無線真係keep住隔幾日就有一個關於奧運o既節目…禮拜6又睇o左佢o個個“全台藝員運動會”?! 最終當然係呃人o架啦…咩全台藝員總動員呀, 其實咪又係得o個d三至五線連名都o翕唔出o既藝員加d新人歌手落場! 連之前宣傳o個個記招都星光熠熠過佢呀!

奧運六星無o左林峰, 得個陳健鋒上位扮六星之首 (呢句我係睇雜誌講o既…真係好抵死!), 仲要個吳卓羲居然跑兩o下見暈, 真係笑死人! 不過點都唔夠高威利好o野, 佢居然可然跑relay跌捧, 真係由始至終都咁騎呢! 反而陳鍵鋒又無想像中咁唔掂, 起碼佢跑最尾o個棒居然可以由包尾追番上尾2, 都算係咁啦…可以話係多得高威利唔少!

另一發現就係今屆d港姐真係好唔掂…連d三線藝員都靚過佢o地…唔怪得知無線要將準決賽同決賽合拼…費事o徙咁多人力物力去做一d無人睇o既show!

今期無線有個新上場靚女新聞主播趙海珠! 本來都唔覺得佢有咩特別, 靚就當然靚啦, 但其實以前o個d新聞之花都唔差…佢又唔係真係靚得咁交關! 但係既然佢引起咁大迴響, 我當然要特登睇o下6:30新聞睇佢係咪真係咁正啦?! 咁o岩o個日去睇牙醫, 佢一路整牙一路有電視睇…咁都好o既, 可以distract o下我等我無咁驚恐! 我見到個牙醫都有不停咁望o下個電視囉, 可見靚女真係會吸引多o左人去睇新聞! 無線呢招確係掂!

D人話佢係翻版田中麗奈, 我睇雜誌封面就覺得佢有d似廿年前o既邵美琪囉! 的確係幾賞心悅目o既!

於是就走去search o下佢o既資料, 睇o下佢o既底細…發現原來d人咁大迴響o既另一原因, 係因為佢根本唔係傳理系出身, 只係因為青春無敵同埋樣靚聲甜，而o係短短幾個月火速上位，穩佔6:30新聞主播席位…係一個“空降”o既女主播!

篇報導話記者行業一向都係論資排輩o既, 所有新聞主播都要經過記者階段，包括要“跑街”採訪、寫稿、剪片同埋現場讀稿等，累積幾年經驗先開始有機會坐正做主播!

但係今次無線搞新意思, 搵兩個齋有樣o既靚女o黎報新聞…係有綽頭o既, 同埋應該真係吸引到一堆平時唔多睇新聞o既人純粹為o左睇靚女而日日捕住個電視…咁又的確可以大大提高收視率o既! 事關無線6:30新聞一向都唔夠亞視o黎…無線有此一著確係有諗頭!

基本上其實主播o既職責又真係只係齋o翕o既…所以只要咬字清色, 聲音清脆, 都叫做可以serve到個purpose!

但又咁睇, 如果齋靠個樣就可以坐到主播個位, 咁洗咩讀傳理系, 洗咩去跑街採訪咁辛苦?! 咁仲邊有人會繼續讀呢d科, 橫掂都俾d“半途出家” (甚至半途都無) o既妹妹仔截晒糊啦!

同埋其實d人情迷女主播, 唔多唔少都係因為佢o地o既“專業形象”, 如果佢係普通一個藝員, 可能大家o既要求又唔一樣! 如果趙海珠只係一個藝員或者歌星仔, 可能d人又唔會覺得佢特別靚…大家對新聞報導員o既欣賞點都有d因為佢o地俾人一個專業o既感覺…如果無o左“pro”呢個element, 大家對佢o地又未必會咁包容!

所以如果一個女主播只係得個空瞉, 我又唔會太喜歡囉!

o個篇報導另外仲有一d受歡迎o既男主播網頁, 估唔到d新聞報導員都咁受歡迎! 而d網站名仲咁優雅添:

呂秉權: 呂秉權別館（www.3url.net/brucelui）

李臻（連佢都有?!）: 紙醉臻迷（www.oscarchun.hk.st/）