1-1(wed) 一月一日一口氣

新年快樂!!!!!

商台話齋 : “一月一日一口氣…”! 新一年開始, 梗係要即刻吸番口2003年o既新鮮空氣啦!

我諗我都要學人許下一d新年願望, 俾個目標自己…雖然照往常o既慣例, 每年新學期開始時老師叫我定下o既目標, 無咩邊幾個真係可以實現到! 不過希望今年可以打破慣例, 講得出做得到啦!

我的2003大計:

1) 賣懶 – 呢樣o野基本上跟o左我廿年, 從未離開過我; 希望新一年o既我可以脫胎換骨…至少唔好所有o野都留到last minute先做!

2) 早睡早起 - 唔係真係話要好健康咁10點鐘上床瞓覺…因為咁係絶對唔可能+不切實際; 但希望我唔好再變本加厲, 朝早6點都唔瞓, 下午4點都唔起身…浪費青春啦!

3) 唔好再咁自閉 – 眾所周知我係一個 “雙面人”, 對住d熟朋友可以好多o野講, 煩到d朋友揪筋; 但係對住d唔係好熟o既朋友, 可以成場無o野講, 好似啞o左咁, 俾人以為我扮晒o野! 呢樣o野我又係話o左要改好多年, 但係都改唔到; 仍然好自閉, 唔會主動去同人傾偈....所以去o左蕃邦咁耐, 嚴格o黎講一個 “新” 朋友都無識到…因此, 希望新o既一年可以主動d去結識o下d洋人同學, 投入一o下蕃邦o既生活, 唔好再咁自閉!

4) 整到一個個人網頁 – 由上年講到依家, 好想有個真正屬於自己o既網上天地…如果今年都整唔到, 相信往後更加唔會有時間做!

暫時諗到咁多, 遲d有其他偉大o既計劃再o係呢度話俾大家知!

HAPPY 2003!