6-6(mon) 美麗傳說2之星願 (2)

(續前篇)

繼續講埋呢期o既“勁劇推介” -“美麗傳說2之星願”…真係幾有質素o既一套劇! 除o左劇情幾緊湊之外, d演員亦都真係做得唔錯, 尤其係佢o地d造型真係不得不讚, 似到暈…仲會隨住劇中o既年代變遷而整番o個個明星當年o既造型, 真係抵死到不得了!

要數最似o既當然係陳煒啦, 佢簡直由外似到內…無論樣貌, 外型, 服裝, 髮型定係講說話 o既口?都似梅姐似到絕! 其實佢96年選亞姐時, d人都不停話佢似梅艷芳同埋梁詠琪 (o個期好興短髮, 仲有一個“真情”呀雪-滕麗明都係俾人話好似梁詠琪)…今次佢就真係有用武之地…簡直係佔盡天時地利人和!

第一集見佢o個個2000年o既金毛短髮look加埋佢講o野o既語氣, 真係以為見鬼呀! 之後就倒?番去80年代初, 佢o個個大鬈髮look, 再加o個套似到十足o既金光閃閃新秀戰衣, 同埋佢扮o個把“IQ博士”式雞仔色…真係一絕! 仲有o係“痴心扣”(胭脂扣) o個個“曇花”(如花) look同埋唱片個“壞女孩”look, 又係似到爆! 睇片頭仲見到佢扮梅姐o係“最後的演唱會”中o既假髮婚紗look, 似到令人有d驚…之後見佢o係個舞台度?低o左…唔知係咪要講佢死o係舞台呢?!

好多人都唔多鍾意陳煒, 但我又一路都覺得佢ok喎…d演技亦不嬲都唔算差!





其他演員就無一個個樣係似佢o地扮o既明星o既, 但係可以見到每個演員都下過苦功…幾落力o下! 同埋d造型+髮型都好鬼似!

應采兒同孫耀威幾本上一d都唔似張曼玉同梁朝偉, 但係佢o地d唔同年代o既造型都幾似, 同埋應采兒其實幾靚o既, 不過唔開聲會好d! 其實佢同孫耀威o係某d神態都有d似曼玉同朝偉o既…不過孫耀威未免笑得太多太燦爛, 無o左朝偉o個種cool! 又或者80年代o既偉仔真係咁都唔出奇…但我真係唔記得! 我反而覺得佢一日到黑e起棚牙笑口噬噬咁, 有d似方力申囉…係幾靚仔幾討好o既, 不過佢已經一把年紀, 仲好似以前咁走d陽光男孩路線, 就未必人人都buy喇!

至於o個個扮華仔o既王浩然, sorry! 真係唔多似…好似其他朋友所講, 佢個樣似張國榮多d! 但係反而扮leslie o個個不知名演員, 真係唔多掂, 完全係侮辱o左哥哥…雖然我都知哥哥唔係呢套戲o既主線, 但都唔洗咁求其搵個人做呀?! 畢竟之後都要講梅姐因為哥哥o既死而情緒大受影響, 病情亦都急轉直下嘛…!

而陳法蓉亦都做得幾好, 扮唔同階段o既劉嘉玲都扮得有d似, 身村亦都同嘉玲姐有得揮! 當年佢選港姐時d人成日都話佢身材好, 但o個時我又唔多覺 (可能係根本唔識睇), 後來睇落又真係o既…! 同埋以前真係一d都唔覺得佢靚 (雖然唔知點解89年港姐我又支持佢多過佢o既勁敵翁慧德, 佢選完之後我仲去o左當時叫“香港電視服務站”(近年改o左名叫“地利店”) o既地方換o左張佢o既港姐冠軍poster…依家仲o係我間房暗角處摺埋o左…都唔好話我唔俾面!)…但近年睇戲, 尤其係“美麗傳說1”, 又覺得佢幾靚喎…原來當年d評判都真係有佢o地o既眼光…好似郭藹明又係咁, 當選o個陣我都一d都唔覺得佢靚, 但逐漸睇落又真係唔錯…評判o既眼光真係雪亮o既!

而咁多個主角之中做得最好o既…我認為係江欣燕! 佢o係外型完全無一忽似吳君如之下, 居然都演繹到佢o既神髓出o黎, 尤其扮佢大笑o個陣, 真係幾似! o係EYT 多年o既扮o野training, 果然係有番兩度…所以話“歡樂今宵”係藝人o既木人巷…真係無講錯! 同埋江欣燕本身都幾靚女o下, 要特登去醜化自己再塞d o野落個身度扮肥, 都有put effort o既…值得加許!

(下期再續)