H-E-J-N-O-M <=> 芒姐再現之...舊日的足跡+英倫遊記

芒姐再現網址: "http://hejnom.blogspot.com/"... 前身為"芒姐.diaryland.com"

星期二, 3月 29, 2005

3-29(tues) 心花放

終於睇o左之前20集都無睇過o既“心花放”, 好彩依家先開始睇, 因為之前o個20集都幾唔掂! 呢期係睇o下陳豪同廖碧兒比較可以接受, 至於我10年前好喜愛o既大勇同“車匙”, 就真係唔該晒! 雖然呢10年好似o係完全唔覺之下就過o左, 但係歲月絕對有o係佢地身上留下痕跡…陶大宇個樣, D皺紋同埋稀疏o既頭髮就唔洗講啦, 就連郭可盈個樣都變到“ARTIFICIAL” o左好多, 好奇怪咁! 佢地兩個o既組合其實已經唔WORK好耐, 再加埋個好似月亮咁o既向海嵐, 真係更唔該晒!

個故仔仲要扮10年前o既“同一屋簷下”, 好娘囉…大佬! 唔好懶係溫情咁啦, 唔係次次都WORK o架! 反而無啦啦吸引到我睇呢套戲係因為d歌…之前o係K-100睇到D主角o係商場唱LIVE, 覺得幾搞笑, 所以o個日特登去聽o下佢D題曲&插曲, 都真係幾有趣! 尤其係隻插曲…搵番4個主角唱, 個個都5音不全咁…幾搞笑! 同埋首歌本身幾好聽, 幾易入耳!

TVB依家不停咁搵番自己D藝員唱劇集主題曲, 肥水不流別人田…咁都好o既, D藝員士氣會高昂D! 上次套“西廂奇緣”係咁, 今次呢套又係咁! 跟住我睇K-100又有吳卓羲, 林峰, 林保怡等唱歌, 拍MV, 仲上埋“勁歌”添!

我終於o係假期買o左個新電話同埋拿o左個電腦去整…破o左好多財, 希望可以擋晒D災啦! 我都好希望咁樣真係可以令我重生! 原來買部新電話玩o下真係幾開心, 用$可以買到o既快樂, 大家不妨去買o下! 我終於明白點解D小朋友有新玩具玩會咁開心…真係可以令人“心花放”!