5-29(sun) 529真情洋溢台慶夜

嘩! o岩o岩睇完期待已久o既“529真情洋溢台慶夜”! 舊年已經講過, 無啦啦由323變成529,今年仲無啦啦變o左“48周年”, 生日同歲數都可以年年變, 亞視果然帶領潮流, 配合到佢o地成日講o既宗旨:“力求創新, 勇於賞試”!

無啦啦變o左“48周年”, 仲要大過無線十年, 因為佢今年無啦啦計埋“麗的”年代, 又話麗的係1957年5月29日開台…但之前o個廿幾年o既台慶又唔見佢計埋麗的o個廿年, 真係想點就點, 好random…但我鍾意!

好多人以為我淨係tvb迷, 好驚訝我連亞視都o岩…其實亞視o既劇有好多我都好buy (再加上鋤強負弱o既元素), 尤其係麗的年代o既劇 (特別係青春劇)…嚴格o黎講我係一個“電視迷”rather than “tvb迷”先o岩!

“真情洋溢台慶夜”呢個名真係改得無錯, 亞視永遠都係sell溫情! 一如我o係去年, 甚至之前多年所講, 我最鍾意睇亞視台慶, 因為永遠都有一種好眾志成城o既感覺…同無線台慶o個種grand o既大show感係兩回事, 另有一番風味! 雖然亞視無無線咁人材濟濟, 但勝在d人落力, 全台總動員, 好有一家人o既感覺…同埋你只要睇過亞視是但一套劇, 就幾乎可以識晒佢全台o既藝員, 因為套套都係用呢d人…睇多幾套, 就有種同佢o地好熟o既感覺!

一開始就搵3個亞姐唱呢期熱門話題“美麗傳說2之星願”o既主題曲-“明星”, 跟住就搵幾個最重點o既藝員出o黎每人講一段懶感人o既“感謝亞視辭”…真係好亞視囉! 然後當然係全台藝員大晒冷…但係都只係得o個幾十個, 不過反而無無線台慶咁走馬看花…at least每人可以影到幾秒!

今年同上年一樣, 又有“亞視舞王”陳寶轅表演跳舞, 仲同6個半紅不黑o既姐仔一齊跳, 再加上o個個n年前o既亞姐亞軍饒林虹 (依家又改o左名但唔知叫咩)…估唔到亞視d藝員都幾多才多藝, 跳舞都幾有板有眼…個個無舞蹈底子都跳得似模似樣喎, at least好過+齊過無線台慶o個d跳舞表演!

仲有3個A貨劉華, 樣貌+舉止+聲線係有d似o既, 最抵死係劉華又o岩o岩係今日上勁歌, 睇完真劉華, 轉台又有假劉華! 仲有, 好耐無聽過劉華唱live (除o左佢自己演唱會, 雖然有d part我o地懷疑佢係咪咀o既)…o係疏於練習之下都算唱得唔錯o架喇!

然後又年年如是咁俾機會d藝員唱o下歌, 人人有份永不落空; 好似佢自己一手捧出o黎o既珈穎, 江美儀, 張嘉倫等 (即係o係“美麗傳說2”扮周星馳o個個…唔知呢個人o係邊度走出o黎o既呢? 佢話係2002年o既亞視新人, 短短3年間走紅得咁快, 又做主持, 又拍劇, 必有佢o既原因…); 仲有好多o係無線撈o左好多年都唔紅o既藝人去到亞視都被重用…好似陳啟泰, 黃子雄, 陳展鵬咁…咩大show都有得出o黎表演o下!

仲有“亞視一姐”陳煒, 煒哥咁o既口才都次次有得做大show司儀…留o係亞視真係有得發圍!

台慶壓軸表演嘉賓居然係萬梓良, 我諗係因為佢有份主演今年o既演台慶重頭劇-“美麗傳說2”! 佢唱當年由佢主演o既“大內群英”主題曲o既浮誇表情+動作, 令我諗起佢口水鼻涕一齊流咁大喊:“so what?!”

臨完show前再o黎一招“眾志成城轉碟記”, 48個藝員一齊轉起48隻碟喎…咁無聊都俾佢諗到…好o野! 舊年就集體拉"木台"布, 今年就轉碟, 話要顯示d藝員有幾咁齊心, 幾咁親力親為…但唔該用膠碟啦, 無啦啦吳廷燁轉轉o下打爛o左隻碟, 真係大吉利是! 最尾司儀陳啟泰同埋陳煒都要轉埋一份, 真係戥佢o地分身乏術!

唔知點解我當年o既“偶像”-“亞視一哥”尹天照, 今年只係做坐上客, 無得出o黎表演呢?!

到ending再整番首台歌“用心留住你”…個節目最終又當然正如亞視o既一貫特色…overrun啦!

真係好精彩o既一個節目, 我要keep起晒亞視d台慶錄影帶先得!

(去年的529亞視台慶報導)