5-29(sat) 529亞視台慶

今日睇電視, 居然無啦啦發現又係“一年一度”o既亞視台慶, 佢不嬲明明係323台慶o架嘛, 後來試過一次唔知點解變o左同無視差唔多o個期o既11月, 依家又忽然調o左去5月, 真係好random…連自己個台o既生日都可以調來調去, 又再次引證呢個世界真係無奇不有o既!

佢個咩“529亞視台慶新勢力”係威係勢咁, 傾盡全台人力物力去搞個大show (俾到佢盡有50人咁大把啦), 只不過係我一路無留意o者…真係枉我話自己係亞視擁蠆!

講真, 亞視o既台慶其實真係幾好睇o架…好睇在佢好溫情, 似一個大家庭多過似一間公司! 又或者係有d似一間學校, d同學出o黎天才表演, 個個都互相支持o下鼓勵o下咁…好warm呀! 我睇完又睇, 年年都好鍾情亞視台慶…呢d咁眾志成城o既節目, 我係幾buy!

而且基本上只要你有睇其中一套亞視劇, 都可以識晒佢全台藝員咁滯…因為套套劇都係由o個d人擔, 只係每次演唔同o既角色! 所以作為亞視藝員, 某程度上都會幾有滿足感o既, 因為所有大show你都會有份演出, 仲要係一人可以擔10個環節, 好似好紅咁 (within亞視o黎講)!

正當你見到袁文杰都可以一人帶成3個環節, 又唱又跳又排舞; 樓南光都可以有一隻歌solo; 5音不全o既朱慧珊都可以因為係亞視o既“中堅份子”而有得unplugged地高歌一曲“問我”, 仲有亞視“音樂總監”張崇基同埋陳展鵬為佢結他陪奏; 更加連陳寶轅呢d我諗大家聽都未聽過 (我就當然只佢係邊個啦…因為佢o係我最愛o既亞視劇集“殭屍”?面擔演過一角) o既藝員擔成part舞…真係人人都有機會囉! 亞視真係一間好肯俾機會員工發揮o既公司…我又要加入亞視呀!

所以如果你o係無線做o左多年但係紅極都紅唔起, 不妨去亞視走一趟…至少可以搵番d滿足感呀嘛!

你睇陳啟泰過到去撈得幾掂…如果佢仲留o係無線, 我恐防佢到依家都仲做緊o個d“男主角的情敵”o既角色! 仲有陳芷菁…依家亞視個個大show都有佢份做司儀, o係無線幾時輪到佢呀?

另外o個個“真情”鄺美雲男友…之前做明珠台鬼鬼地o個個男主持黃子雄…o係無線又係幾時輪到佢出o黎表演呀? 但係過到去亞視就套套重頭劇都有佢份, 台慶仲有份同陳啟泰+樓南光扮Bee Gees整個咩3重唱添!

最搞笑o個個莫過於陳展鵬…當年佢o係無線做o左一陣之後都簽過當時最大o既唱片公司寶麗金做歌手, 仲出過唱片添 (同期仲有隊組合叫“sisters”, 都出過幾隻歌…但係唔知點解最後亦都唔見o左…o個時係o岩o岩入大學之前o既暑假, 即98年夏天)! 其實佢唱得唔太差, 一出道都有幾多fan屎o架喎…仲有佢首“迷你”我當年o係卡拉ok都唱過幾次…ok o架喎! 唔知點解佢之後咁唔掂, 後尾仲去埋亞視拍劇…今次佢除o左同d人表演o個d咩用手打自己身體發出聲音再奏出“樂曲”o既環節之外, 仲有得表演打ping pong波(唔識打呢兩隻字), 因為佢以前曾經係唔知咩代表隊喎! 亞視此舉確係可以俾佢d員工各展所長o既…亦都令大家明白到“天生我才必有用”(之後o個句更加o岩聽)…但係有d9唔搭8囉!

亞視台慶o既另一大特色就係“10年如一日”…好記得96年o既台慶見到陳秀雯o岩o岩復出拍“再見艷陽天”仲高歌幾曲, 點知今次睇台慶又係見到有一part俾佢高歌一曲, 又係同馬景淘拍台慶劇, 又係d“咩咩天”…亞視最叻就係食住o個條水不停咁食食食…雖然呢d“10年如一日”o既o野我都幾buy, 因為某程度上我都係d咁o既人; 但係有時d o野都係見好就收會比較明智!

仲有我最愛o既“殭屍”…又開拍第3輯…仲要係隔o左咁多年先再拍…雖然我好鍾意呢套劇, 但真係唔該佢見好就收啦! 第2輯已經俾佢拍到壞晒, 懶勁咁但係反而唔及第1輯好睇…仲係差好遠o個隻 (我同10個人講有11個人都係咁講)! 仲要跟本已經拍到無o野可以再拍啦…阿尹天照同埋萬綺雯都已經老晒 (雖然阿照不嬲都好老…所以先可以演活殭屍o既角色; 當年播緊“殭屍”o既時候我真係幾“鍾意”尹天照o架, 仲俾同學仔笑添!), 楊恭如就最好唔好出現喇, 阿杜文澤又已經巴之閉咁做o左電影主角, 都無咩意思再拍啦!

99年o既亞視台慶頒獎禮全部都係“殭屍”d演員?獎, 睇得我好開心o架喎…但係我估唔到5年之後, 佢o地仍然係食緊呢條水, 仲要係愈食愈唔掂o個隻!