1-11(tues) 愛(下)

繼續回顧番上個禮拜個show…都真係好眾志成城o既, 因為有十幾個台聯播!

全晚最好反應我諗係beyond唱amani o個part, 全場歡呼…反而我o地o既特首出場我好似聽到d噓聲?! Beyond果然受歡迎, 呢隻歌亦都係好受歡迎!

最好睇o個part除o左beyond, 就當然係全人類大合唱啦, 又係o個句:“眾志成城”嘛! 尤其係7點鐘o個part一開始時個個齊齊整整排晒o係度, 好grand, 好感動…但係又好似TQ囉!

總好過6:30前o個一part 主要由新人或者過氣偶像演出, 一片混亂, 好唔掂! 唱大會主題曲時仲要係無人記得歌詞, 再加上張柏芝唔識唱但又肉緊地胡亂領唱…真係好失禮! d大牌歌星反而記好晒歌詞, d新人或3線歌手一句歌詞都唔記, 真係抵佢o地唔紅! 我覺得4:00-6:30 o個段其實似rehearsal多d!

2R唱“同步過冬”居然可以一句都唔識, 好心唔識唱就搵幾個鐘背熟佢, 唔好咁核突! 仲有e-kids懶型咁rap, 但完全唔到beat, 破壞晒我隻“同步過冬”呀!

更加估唔到林志美都唱得好難聽, 以前佢把聲好好聽o架嘛…反而薛海琪唱得幾好喎! 抵佢橫掃所有樂壇頒獎禮…係唔明點解個冬菇頭妹妹吳日言都可以個個台都有獎…佢個樣又唔多靚唱歌又唔多好…如果真係因為佢個突出o既形象, 我真係要寫個“服”字俾佢間唱片公司!

依家d新人真係多o左好多機會, 上次“忘我大匯演”廿幾個新人先集齊o係一part每人唱一段(包括我當時最喜愛o既sammi)…今次d新人都可以攝到o係4:00-6:30 唱成隻歌!

最騎呢係見到4:00 o個part由草蜢打頭陣囉…仲要只係得蔡一傑同蘇志威! 事關當年“忘我”又係佢o地打頭陣, 但係當時佢o地係因為大紅大紫所以有得o係呢個有利時間表演, 今次就好明顯因為係禮拜5, o個個時間大部份人都未放工放學, 擺明係因為佢o地已經風光不再, 所以要放o係“新人/3線歌手”時段度! 關淑怡反而可以o係黃金時間演出…不過佢又真係唱得幾動聽o既!

仲有龍劍笙同梅雪詩…好可怕…尤其見到"阿嗲"都想嘔! 阿刨就其實ok o既, 同埋幾有任姐o既影子 (但平常講o野都有d恐怖…同呀寶珠姐都好似有語障咁! 阿嗲就更加唔洗講…一開口真係令人打十億個冷震!)! 不過講句公道說話, 佢兩個又真係唱得好過其他人o既…雖然我一d都唔buy粵曲! 但自從聽過twins唱粵曲之後, 我發覺佢o地真係唱得好好聽…又係抵佢o地咁紅o既!

阿寶珠姐就真係唔該唔好再咩都拖埋佢個“經經”出o黎…佢都成30幾歲人仲成日黐住呀媽, 又帶極都紅唔起, keep住o係3-4線o既位置…真係好令人難受!

仲有許冠文, 佢講o既笑話真係已經唔再好笑, 現場亦都唔見有人笑…我諗許氏兄弟真係正正式式咁out o左喇!

同埋maria cordero…好怕佢永遠都係以“友誼之光”腔口去唱任何歌…太激動喇!

反而鍾意tony jaa…因為佢個名好得意, 好似“湯渣”! 仲有阿祖明…因為佢真係有d似snoopy!

仲有同學仔陳貝兒, 真係做得幾好, 咁大個show都咁淡定…同埋佢個拍檔呀“6號”都係我o係有線主播之中比較欣賞o既…其他就真係唔該晒喇! 所以有線派佢兩個出o黎確係明智之舉!

仲有, 志偉講o野真係好掂, 簡直係我偶像…認真又得, 煽情又得, 搞笑又得, 抵死又得!

唯一唔明係點解唔好似上次咁o係禮拜六搞? 咁樣好過weekdays好多…可能真係因為無線勁歌總選所以要讓路…咁無線實在係太巴閉喇!