H-E-J-N-O-M <=> 芒姐再現之...舊日的足跡+英倫遊記

芒姐再現網址: "http://hejnom.blogspot.com/"... 前身為"芒姐.diaryland.com"

星期一, 8月 16, 2004

8-16(mon) 2004香港小姐

禮拜五晚通宵睇奧運開幕禮…我一向最鍾意睇d深宵直播節目o架嘛! 除o左有奧運開幕, 無線仲順手一次過做埋港姐準+決賽!

其實今次咁一舖過都幾好o既, 慳水慳力, 又緊湊d! 橫掂港姐收視一年比一年低, 縮成一個節目仲只係o係電視城一廠搞, 的確係化算好多! 連嘉賓都大縮皮, 全部無線自己d藝員 (仲要係之後全線要直踩落奧運開幕禮…包括“奧運六星"+主持胡杏兒同埋楊婉儀), 再加個無線之子李克勤同埋梁詠琪!

D港姐睇睇o下唔知點解又順眼o左好多, 連d化裝亦都俾之前咁多屆o既港姐好o左 (因為通常都係化醜o左d佳麗o架嘛!)…仲有我幾buy佢個“香港美麗大學”o既主題, 反而俾起搞個準決賽出o黎更加成功o地令觀眾去認識每一個候選佳麗! 而o個6集o既“美麗大學”亦都好成功o地塑造o左一個好團結o既形象俾一班妹妹仔, 仲可以有機會俾佢o地表現真性情, 自然過前幾年好多!

而今年個冠軍徐子珊我都幾buy佢…其實3甲都ok, 幾令人滿意!

係個季軍符思思騎呢d…好怕呢d講o野嬌聲嗲氣o既妹妹仔…佢仲要係好嚴重o個隻! 淨係聽把聲, 以為係d6歲小妹妹! 不過佢呢隻騎呢反而出到位, 幾搞笑…相信d評判都幾buy, 因為好似好乖咁! 同埋佢個樣唔開口都算ok靚o既!

亞軍同冠軍就不嬲都算大熱, 所以無咩驚喜! 學曾志偉話齋, 今年真係算呢幾年o黎最大熱勝出!

朱慧敏勝在樣樣都幾平均, 又夠高大, 個感覺都幾大方!

徐子珊俾我第一個印象係跳舞好好睇, 同埋講o野幾叻! 因為o係集集“美麗大學”入面, d佳麗都有機會發表o下意見…但係好似閒話家常咁, 所以會表現得自然好多!

一向都喜歡d比較口齒伶俐o既人, 所以我幾buy佢! 同埋佢好有自信, 呢個亦都係佢掂o既原因!

選完之後睇o左一個anna同佢做o既訪問, 發覺佢講o野真係算幾掂, 健談不特止, 仲幾自然添! 通常d o岩o岩選完出o黎o既冠軍都係口“疾疾”, 背台詞, 答埋d行貨答案, 好似o個個得個樣但係講o野好低能o既曹敏莉, 或者係講o野十足十小學生朗誦o既“新一代性感尤物"楊思琦小姐! 所以我覺得今屆o既冠軍可塑性幾高…係唔知點解o係呢個訪問入面個樣好似湯寶如囉?!