8-2(sat) 經典再重溫 - IQ成熟時2

(續前篇)

94年第1次睇完呢套超cutie劇之後, 就勁鍾意之前無咩見過個樣, 淨係知佢曾經係名DJ o既鄧藹霖 (正確o黎講係80年代o既佢!)…可惜當時仲未有internet, 完全無方法搵到一d關於佢或者呢套劇o既資料…唯有係咁四圍摷我o個d珍藏舊雜誌, 但咩都搵唔到！而佢當時又已經淡出o左港台, 我諗我淨係偶然會聽到有佢把聲o既宣傳聲帶, 同埋記得佢o個個“家計會”年年驗身廣告囉…仲有就係知道佢係同淑梅姐同期o既“auntie級”DJ囉…係咁多!

(當然往後o係好多唔同o既途徑再見番變o左一個“師奶”o既鄧藹霖…把聲依然好好聽, 係我最buy o既“沉中帶清, 咬字清晰”標準DJ聲! 但個外型就變o左一個懶trendy o既阿太…有d恐怖囉! 不過港台呢排播o個d“集體回憶: 文化經典”節目, 成日都有播番佢o地以前d舊片段…“香蕉姐姐”當年確係討好喎!)



隨住日子過去, 雖然一直都仍然好鍾意“IQ時熟時”呢套劇, 但o個股“熱衷”已經無94年一睇完時咁強勁…係偶然會同人提起o既, 但我身邊o既朋友都無咩邊個可以同我o係呢方面搭到“o爹”…!

直至1999年X’mas, o係year 2準備考Mid-term時o既某一日, 我翻開電視節目表…毅然發現“IQ成熟時”5隻大字…開心到叫o左出o黎~~! 點解最好睇o既節目, 永遠都要o係考試時先重播o架?!!!!!!!!!!!!!!!! 不過我唔理得咁多…等o左咁多年, 終於都有得睇…仲可以彌補番我當年miss o左第1集o既遺憾添…好好好興奮呀! 況且好睇o既劇集從來都係我溫書o既最大推動力…會考前o既“刑事偵緝檔案2”同埋“天地男兒”, 都幫o左我唔少!



估唔到呢次重播, 比起上次引起更大o既迴響…我身邊好多朋友都出奇地有留意呢套劇 (唔理係俾我推介[強迫] o既, 定係自己發現o既), 仲個個都讚不絕口; 加上internet o既普及, 所有資訊都傳得快好多…所以當時都掀起o左一個小小o既“IQ成熟時熱潮”o架! 而當時o係網上o既好多discussion forum, 都可以搵到“IQ成熟時”o既資料…令我對整個劇o既“背景”, 同埋所有演員o既資料都清楚o左好多… o係呢方面, 真係不得不讚o下internet o既偉大!



就連發o左癲o既蔡楓華, 都可以食住呢個勢o係伊館開o左場演唱會添…都唔好話個熱潮唔勁! 而我, 當然都有去睇呢次“史無前例” o既演唱會啦…其實如果佢唔發癲o既時候, 就咁唱o下歌都幾ok o既!

(下期續)