11-2(tues) “永遠的偶像-part 1”

有呢個地方真係好 (我指呢個俾我發o翕風o既地方), 可以暢所欲言! 雖然其實我都有去留言版或者討論區同其他電視迷切磋o既…但係呢度更加可以由我話晒事嘛…鍾意o翕咩topic都得…同埋可以過多幾年睇番自己當時對某d o野o既感想!

好, 繼續講番上期未講完o既“我本善良”+溫兆倫+邵美琪…!

睇o左好多篇關於溫兆倫同埋邵美琪o既o野…其實佢兩個都有個共通點, 就係曾經非常光輝過, 但係依家都跌o左落人生一個低點, 但又仲o係個圈度浮浮沉沉緊!

原來一剎那o既光輝, 真係唔代表永恆…由呢兩個曾經係90年代無線最當紅o既小生同埋花旦o黎演繹就最貼切不過!

愈睇就愈心o翕, 睇佢兩個現實中o既故事, 就好似以前會考中文科讀o個d詩人老o左被貶官o既悲涼故事! 亦都活生生咁引證o左作為藝人o既“壽命”真係好短暫, 完全無得預測…你今日好紅, 聽日可能跌到落谷底! (蔡楓華就係最好o既例子…雖然佢係曾經失言, 但我覺得都未至於要落得如斯田地! 依家o個d所謂名星講o野咪仲不知所謂…佢唯有慨嘆自己唔係生於呢個年代!)

某程度上, 我覺得蔡楓華其實講得好有道理, 因為“一剎那o既光輝真係唔代表永恆”!



曾經佢o地係一年可以有6,7部劇擔正做主角o既當紅藝人…依家o既佢o地…溫兆倫都叫做好少少, 仲有男主角做o下…不過係無得播o個隻(好似佢同郭羨妮o個套訂情作“牛郎織女”), 邵美琪再出番o黎已經係做人o地阿媽…even係郭羨妮呀媽, 陳綿鴻呀媽, 佘佘呀媽…好慘! 佢年紀都唔係大呢d人好多o者! 但無可否認…佢昔日o既光彩真係不復再! 不過商天娥o係“隔世追兇”都要做郭晉安呀媽…所以話, 女人真係唔kum老!

呢d全部當年紅得發紫o既演員, 依家都淪為2,3線, 甚至大配角…有幾多個可以好似佢個好友呀鄧萃雯咁, 到呢個年紀再創事業新高峰呀? 所以今年“我最喜愛的女主角”一定要俾佢…咁樣先至皆大歡喜, 係最完滿o既賽果!

我覺得溫兆倫某程度上都有少少自己“手羅”o黎, 因為佢同佢d老婆同埋女友分手時搞得太核突…睇番d報導, 原來佢除o左追番陳梅馨d掟煲費之外, 仲曾經向佢第一任老婆追討“青春損失費”…真係核突到極點…邊有d咁無風度o既男人o架?!

佢雖然演技好又有型 (當時), 做主持仲好鬼馬, 不過佢個人本身就真係唔多掂…所以佢搞成咁都係抵佢o既! (不過我相信最大原因都係因為佢已經年華老去…雖然呢方面佢作為一個男藝人已經著數過女藝人好多!)
又一篇好詳盡o既分析同埋介紹: (不過又係簡體o既)

http://ent.sina.com.cn/s/h/2003-11-10/0810230354.html

(又再下期續)