10-21(thurs) 繼續沉悶演唱會

阿歌神終於舉行完佢個搞極都唔完o既演唱會! 我由原本好期待去睇, 到睇完之後有d鄙視佢, 直到依家睇完兩個月都未post到我篇“觀後感想”上o黎! 本來諗住算喇…但橫掂之前都打o左一半, 咁不如打埋佢, 無謂o徙呀!

話說8月o既時候, 原本係懷住極奇興奮+期待o既心情去睇歌神o既“繼續微笑演唱會”…點知turn out悶到揪筋…變o左“繼續沉悶演唱會”!

我去睇之前o個日有個同事去睇o左, 佢已經話我聽有d悶, 11點就想走! 但係另一個同事就仍然話好好睇…咁我就諗會唔會係第一個同事唔多熟佢d歌所以先咁講?!

點知我睇到9點幾…已經好想走…不停咁睇錶, 心諗d時間點解過得咁慢?! 我自問都算熟佢d歌, 但都依然悶得發慌, 可知根本唔關熟唔熟佢d歌事!

雖然之前話俾d同事聽我去睇sam hui演唱會, 佢o地已經話: “o下? 你居然有興趣去睇? 佢完全唔係我o地個年代o架喎?” (註: 講呢句話o既人本身都大我超過8年) 我話: “係呀! 我好期待o架喎! 佢d歌又好聽又諷刺時弊…我好鍾意o架o番! 我不嬲都話我唔屬於我自己個年代o架啦!”

ok, 咁我諗住佢個演唱會全城哄動, 開完再開, 長做長有, 一定唔差得去邊o卦?! Sorry囉…我覺得即使以一個客觀o既態去睇, 佢個演唱會都係悶場連連, 同埋佢真係有d (以一個極包容o既standard o黎講) out…直頭好似隱居o左o係深山20年, 同個社會脫晒節!

我諗呢個演唱會o既最大敗筆就係佢“口水多過茶”囉…其實本來可以11點完, 但係佢唱一隻歌就講足10分鐘o野, 仲要係語無倫次, 肉麻當有趣…直頭好似黐o左線…唔怪得知佢成日話自己 “關帝上身”…好明顯係“青山symtoms”!

跟住有好多大hit o既歌佢又無唱, 仲要不停咁dum波鐘, 佢d歌本身都已經係repeat完再repeat o架啦…點知佢仲要唱尾o個句都再repeat三次…簡直扼錢!

再o黎就係整d極奇唔靚+唔掂+唱歌唔好聽o既sam’s angels出o黎表演, 夾硬扯高把聲o黎唱…都真係幾難聽o下! 我都唔明佢點解千揀萬揀都揀到d咁o既人o黎捧…雖然佢要開公司捧新人o者, 都唔好唱成咁都照推佢o地出o黎呀! 咁咪盞做衰自己個朵!

佢仲要扺死到sam’s angels都唔夠, 仲要整埋d咩“楊枝甘露”, 當中我仲見到無線個姐仔楊娜 (依家好似改o左名叫楊卓娜…總之就係楊怡個家姐啦! 亦即係楊思琦o個屆o既落選港姐! 但係唔知點解佢同楊怡一d都唔似樣, 楊怡靚好多 [又或者各有不同美態啦!]…唔講真係無人知佢o地係兩姐妹…楊怡同張可頤仲似兩姐妹啦!)…唔知阿歌神o係邊度搵呢堆咁o既人出o黎捧!

而阿歌神最唔掂之處, 除o左係口水多過茶之外, 就係變成一個金魚佬! 係人都咀一餐, 嘉賓又咀, 觀眾又咀, 男又咀, 女又咀…好濫! o係SARS o個排我睇o下佢敢唔敢咁咀法?!

以前佢俾人o既感覺係好正氣o架嘛…依家出番o黎o既形象就好似變成一個鹹濕伯父咁! 好可悲!

我諗全個演唱會最吸引o既都係佢d紀念品, 果然係幾精美同埋幾代表到佢…同埋都叫relatively實用! 我本來打算用佢個紅白藍膠袋做食lunch袋…都唔知幾有型! 點知用o左一日就俾我d同事/朋友話我影衰佢o地, 強烈要求我停止使用! 哎! 依家d人真係無taste!