10-31(sun) 騎著電單車的黑皮褸

(續前篇“郭富城舞台寶典@舞林大會2004”)

最正就係佢一開場就唱番佢最經典o既歌“對你愛不完” (當然唔少得o個個當時3歲到80歲都識得做o既手勢…所以話, 90年代o既歌確係有佢o既特色同埋成功之處…大家一聽隻歌, 就不期然識跟住做埋d動作…好似我之前講過o既“獨自去kowloon”, “讓我呼叫, 讓我心跳…”, “sayonara oh!”), 跟住係“第4晚深情”等一jar快歌…隻隻大家都耳熟能詳! 即使唔識唱晒全部, 10隻都一定識唱8隻!

跟住每一part都有個theme, d景亦都唔錯, d歌衫更加唔洗講, 真係幾掂喎, 仲有佢個刺o左朵花o既頭, 都好有型! 同埋o個個佢話係佢自己特登設計o黎親近山頂觀眾o既會升高o既台, 都係一個唔錯o既構思…每一個畫面都好靚! 大家可以睇o下電視o既報導 (大飲茶或者娛樂新聞台), 再唔係睇o下仲有冇飛去買張入去睇o下囉!

個演唱會一直到9:30之前都真係好掂! 最唔掂就係佢9:30之後開始講o野, 用好深情o既tone去講埋d咩“好耐無見, 我真係好掛住你o地…我行近d等大家睇清楚我係咪瘦o左!”…真係好難頂, 打10個冷震都抵銷唔到! 但係我都好明白佢都算收斂o左好多, 以前佢唱唔夠兩隻歌就要講一d深情o既說話, 而程度上亦都比起呢d難頂10倍, 例如: “大家愛唔愛我呀? 有幾愛我呀? 我今日係咪好靚仔?…下刪20000字)…我知佢今次都忍得好辛苦o架喇…所以值得讚一讚!

其實作為一個歌手 (基本上作為一個人), 應該要明白自己o既定位, 知道自己o既長處同埋短處, 去避重就輕! 最緊要明白“顯醜不如藏拙”o既道理, 唔係人做你就要做o架嘛! 城城亦應該明白佢根本講o野就唔叻, 咁不如唱多d歌跳多d舞啦! 同埋最緊要唔洗每次都唱到某個位就谷d眼淚出o黎…見佢次次都谷得好辛苦…睇o既人又覺得核突…佢o係呢方面真係應該慳d! 小美人應該同佢檢討o下啦! (大家如果稍為好記性o既話, 都會記得佢o係98年o既勁歌總選得到“男歌手”獎, 講得獎感受時死拖爛拖, 仲要死谷眼淚…隔離呀志偉/呀旦露出一副好不屑o既神色 <其他人以至電視機前面o既觀眾包括本人又何嘗唔係呢?!>…最終到佢唱歌時已經唔夠時間, 唱到一半就俾人cut o左…so cheap!)

其實時下o既歌手, 除o左李克勤 (校長都ok o既, 不過略嫌有些少out)同鄭中基, 根本無一個真係識講o野, 可以搞到氣氛…新一派o既何韻詩都算幾好 (我指口才…歌藝同舞藝就更加唔洗多講啦! ) 我敢講佢o係不久o既將來一定會成為“最受歡迎女歌手”!

我記得o係99年, 我表姐曾經問過我繼之前睇好鄭秀文同埋楊千嬅之後, 會睇好邊個?

我答佢...何韻詩 [雖然我唔知當時佢知唔知何韻詩係邊個]!

…其實佢o個時根本未有碟出, 係有得做o下sunday新地帶, 翡翠音樂幹線主持, 拍o左套“反黑先鋒”, 同埋偶然o係d騎呢節目 [例如當時夜晚12點幾會有個加州紅o既10分鐘唱k節目]度唱兩嘴…但係自新秀之後我已經覺得佢好掂…所以我見到佢有機會出碟都好高興…至少證明我o既眼光!( 大家記住我今日o係呢度講過呢番說話, 免得日後話我口講無憑! 哈哈哈哈哈!)

除o左佢o地幾個, 其他人好應該少講為妙...見佢o地每次演唱會係咁o係度背台詞扮講心底話, 都戥佢o地辛苦…同埋覺得好核突, 好假!

好彩佢核突完一輪, 都俾番d好o野大家睇, 連場勁歌熱舞, 再加佢d經典慢歌, 簡直帶大家返番90年代初 (我發覺我呢期好似生活o係90年代, 又追緊“我本善良”, 又不停聽番d舊歌…好令人懷念o既一段時間…好想去唱“老餅k”, 唱番“4大天王”全部o既舊歌!)

最正最正係全場一齊合唱佢d成名作“我是不是該安靜的走開”, “到底有誰能夠告訴我”, “愛的呼喚”等…仲有92年熱播o既“我為何讓你嘔”! 我記得當時大家成日拿呢首歌o黎開玩笑…f.1暑假時新城深夜4點有個節目係叫d人改歌詞o黎唱歌, 差不多晚晚都有人改呢隻; 仲有“軟硬”個節目亦都成日o係度講“騎著電單車的黑皮褸”, 同埋“誰在吻你的口”…主力都係笑佢d歌詞騎呢! 但係不得不承認, 呢隻歌當時真係大hit過! o個年暑假聽得最多o既歌, 都相信係呢隻+sayonara oh+舊歡如夢!

咁樣講講o下原來佢都有幾多好聽o既經典歌曲! 不過要我揀我最鍾o個幾隻…慢o既我會揀“我是不是該安靜的走開” (唔知點解好鍾意佢以超雞仔聲+唔太標準o既國語去唱呢隻歌…可能係當年朝朝早搭車返學校時, 都會聽到淑梅姐播呢隻歌…所以又係一個情意結!); 快歌我就會揀“失憶諒解備忘錄”, 簡真次次聽到都想聞歌起舞!

今日返到公司個同事又問我個演唱會好唔好睇…我話超好睇, 如果佢一講o野可以熄o左佢個咪, 我會俾呢個演唱會95分! (因為學煇歌話齋, 無o野係完美o既…但係以我d咁“蝦薯”o既人o黎講, 呢個分數可以話係超高分!) 而個同事亦都話, 佢o係有線都睇o左d演唱會片段, 發覺真係好精彩, 尤其係佢向3位天皇巨星籮記, 哥哥同埋梅姐至敬o個part…搞到連佢本來咁反對o既人都話想買張飛入去睇!