10-5(tues) 溫兆倫

呢期食o左好多tea, 唱o左好多k, 煲o左好多電視劇, 迷上o左15年前o既溫兆倫 (唔准笑!) (記住, 係15年前o既佢, 絕對絕對絕對唔係依家o既佢!) 仲o係k唱o左兩次佢o既“沒有你之後”同埋1次“我是情痴”!

唔好笑呀…同好多朋友講開, 原來佢o地當年都覺得溫兆倫幾型o架…尤其佢o個期著住件大褸…真係幾煞食o下…可以話係迷倒萬千少女 (可能包括當年o既郭羨妮…仲有陳梅馨)!

其實佢仲係幾funny同埋有才華添…我當年禮拜6,日都有追佢同阮兆祥, 王書麒, 陳國邦主持o既電台節目“反斗/週日祥麒倫邦”…好好笑o架! 仲有, 隻“沒有你之後”好似係佢自己填詞o既添!

依家o個兩隻歌上晒腦, 腦海中不停咁出現“沒有你之後…” 同埋“情是為你痴”o既melody (註: 呢隻歌第2段更[手羅]膽…居然係“人是為你生…”)…唱完之後發現呢兩隻歌o既旋律其實好相似, 個style亦都好似…仲係好typical80年代尾90年代初o既歌—就係不停咁重覆…一段重唱3次! 所以,o個隻“沒有你之後”居然有成4:59!

落力到返屋企摷番d陳年舊盒帶, 係十幾年前買落o既“沒有你之後”…成餅帶除o左呢隻歌之外都無咩邊隻係識o既…最大發現係原來呢隻歌唔係“我本善良”o既插曲, 而係“還我本色”o既插曲…但係“還我本色”好似無溫兆倫做o架喎?!

我覺得呢期最好睇o既電視劇絕對係“我本善良”, 而唔係咩“金枝慾孽”! D女人o既宮廷鬥爭我完全無興趣睇 (尤其o係現實生活o既大家庭中, 已經睇慣晒d勾心鬥角o既場面, 根本唔需要再睇戲!)…再加上d朋友都識得講話我唔鍾意睇古裝戲o架嘛…所以我完全無追!

我係咁o架喇…人睇我就唔鍾意睇, “阿旺”係咁, “titanic”係咁, “少林足球”都係咁! (雖然我有買到“少林足球”vcd去英國, 但係睇o左一半已經無心機, 開住但係走o左去做第二d o野!)

我相信“金枝慾孽”最好睇o個part應該係尋晚林保怡o係“大飲茶”尷尷尬尬咁向黎姿示愛…真得o黎又有d假…但真係好好笑囉…林保怡唔係基o既咩? 唔知今日報紙有無報導呢?! 不過點都好, 即使係假都好有娛樂性…因為你真係估佢唔到! 笑死我!