8-31(tues) 中國人的驕傲

奧運終於都完滿結束…正如好多朋友一樣…都有一絲失落感! (無追睇奧運既朋友…你o地無共鳴…so sad! 哈!) 好唔捨得呀! 每晚好似無o左一個好大o既寄託咁, 但係另一方面…終於可以[目訓]多d…都好!

全個奧運最緊張刺激o既一幕, 相信非星期六凌晨o既女排決賽莫屬! 嘩! 真係好刺激呀! 尤其是最尾一局, 睇到我廁所都唔捨得去!

o個晚因為依然慶祝緊生日, 玩到凌晨3點咁滯…好彩返得切o黎睇女排o者! 本來都唔係太熱衷睇呢個項目, 淨係92年o個屆睇得比較多…後尾中國太唔掂都費事睇喇!

好彩今次無miss咋, 呢個歷史性時刻, 作為中國人又點可以錯過呢?

嘩, 見到中國隊最終反敗為勝…追番3局…打完最尾一球, 所有著紅衫o既球員都衝晒出o黎擁作一團, 球員連教練連現場觀眾 (再加埋電視機旁邊o既觀眾) 都為呢個失落o左20年o既金牌放聲大哭…連我呢d咁冷漠o既人, 睇到呢個場面都感動到眼泛淚光!

另一邊廂, 見到俄羅斯o個班球員, 亦因為呢個“得而復失”o既金牌而失聲痛哭…今次真係“成王敗寇”, 箇中滋味相信不足為外人道!

而當中最感動o既位, 就必定要數中國國旗升起o個一刻! 中國國旗o係奧運成日都有升起, 但我都係第一次聽到現場有咁多人一齊高唱國歌, 大聲到o係電視機直播出o黎時都聽到…中國人真係威! 無錯…我係好愛國o架! 明明係黃皮膚, 做咩走去崇洋喎?!

本來當日o既焦點應該係男子高台跳水睇田亮再擇金! 點知佢居然甩手拿唔到金牌…好彩全人類o既注意力到轉o左去女排度!

不過我覺得俾胡佳贏到都好呀! 田亮太有信心, 太過以為自己一定得, 又話要拿金牌o黎賀自己生日…太得戚, 鋒芒太露, 係要挫o下佢o既銳氣!

同埋佢雙人跳水飛起上屆o既拍檔胡佳 (雖然應該唔係佢o既決定)…人o地咁慘, 咪等佢拿番一塊囉…皆大歡喜o者! 同埋人o地當日係跳得好d嘛!

尋日o個兩位“香港孖寶”凱旋歸來, 全香港又懶大件事咁搞埋d歡迎會, 無線仲懶勁咁搞個特備節目!

講真, 我又唔覺得特別值得高興喎! 你要搵金牌選手, 中國大把啦! 當年李麗珊第一次為香港拿金牌就話威o者, 佢o地今次只係拿銀牌…唔洗搞到咁巴閉?! 仲要珊珊都話係香港土生土長, 佢o地只係落o左o黎4年…咁不如招募d金牌選手落o黎代表香港…拿番10個8個金牌咪仲威!

但係唔該下次叫佢o地d家人千祈唔好著d印有“全家福”o既t-shirt去接機…因為真係好娘!