8-30(mon) Albert Au久別重逢演唱會

上個禮拜某日去o左睇一個頗為唔掂o既演唱會…其實之前兩個禮拜睇完歌神同Sammi演唱會, 都話得閒要o係度同大家探討番, 但一路都未有時間講住…依家講o左呢個近期d o既先啦!

今次呢個Albert Au演唱會, 其實我由始至終都無興趣睇…事關佢不嬲俾我o既感覺都幾悶o下, 講o野又係懶 (記住, 係“懶”) 風趣o個隻, 仲要前幾年聽開佢個電台節目, 發覺佢唱來唱去都係o個幾隻歌, 同埋如果我要聽倒不如開電台聽佢個節目算啦, 唔洗o徙錢買飛入場睇! 但係基於有朋友熱烈咁邀請我去睇, 咁唯有順o下佢意啦…橫掂去o下都唔洗死o既?!

不過, 原來去o下d自己唔多鍾意聽o既演唱會, 真係會死o架! 唔係悶死…而係俾人寸死!

事緣我不嬲去演唱會都唔會有d咩反應, 手我都幾乎唔係好想拍…事前我已經諗: 死啦! 我係咪要扮到好投入, d表演者每唱完一首歌我都要熱烈地鼓掌呢?

但係其實大家都知道我去演唱會都去到麻木晒, 即使去睇一d比較精彩o既演唱會, 都唔會太興奮…何況睇呢d咁yim悶o既民歌演唱會呢?! 我諗我真係去演唱會去得太濫, 去到好似例行公事咁…一d興奮或者期待o既感覺都無!

D歌就唔係話唔好聽, 但一係就聽得多到嘔o個隻, 一係就聽都未聽過o既…我已經自命聽得好多唔係屬於我個年代o既歌o架啦, 仲要立立雜雜, 騎騎呢呢o個d我都會聽o下…但呢d所謂好hit o既民歌…我真係未聽過囉! 而我相信同我一個年代o既人, 直頭成個演唱會d歌都唔會識!

最抵死o既係, 雖然個場完全坐唔滿, 但係去得o既人全部都係hardcore fans…隻隻歌都識, 仲會瘋狂地拍和! 連o個d咩“南Y島之歌”, 唔知咩歌手唱o既歌全部都識晒…仲要fing晒手…好誇張!

跟住到李健達出o黎唱佢一曲走天涯o個隻“也許不易”, 我隔離個朋友問我佢係咩水? 我就話俾佢聽佢係80年代o既一個4線歌手, 我點解會識佢?…就係因為89年港姐準決賽叫o左20個年青歌手出o黎同d港姐又唱又跳 (包括克勤, 黃凱芹, 草蜢, beyond, 王翊, fundamental etc)…佢就係同陳法蓉part o個個, 所以我識得佢!

跟住我個朋友簡直覺得我係“痴線”o既…記埋d咁唔等洗o既o野! 大佬…我都唔想o架! 我個腦係要記埋d咁o既o野…我都無法o架…我又唔係特登記o既!

是但啦…climax係李健達叫d人一齊舉起手fing, 同佢打拍子! 我o地前前後後左左右右都有好多人跟住做…好明顯鍾意聽民歌o既人都好聽話! 跟住我只係露出一貫o既不屑面口, 同埋同我隔離個朋友一齊望o下我另外一邊隔離位個姐姐o者…跟住佢就開始同佢個唔知男友定老公講: “哎! o黎得演唱會緊係要投入d o架啦…等個表演者感覺到我o地支持佢嘛 (人o地一定見到你啦!)…都唔明d人咁唔投入咁坐o係度做咩?! 咁不如唔好o黎睇啦!”

嘩! 我真係想xyz佢o架喇! 我投唔投入又關你事…阿姐有錢無訂洗鍾意將d錢o徙o係度呀? 唔得咩? 家家有求o者! 我係覺得好悶呀, 我係唔鍾意fing手呀…關你咩事呀依家?! 係咪有病o架?!

本來我可以bear番佢…但都費事喇…唔通同佢鬥望咩? 我只係好不屑咁閉目養神hup番陣…都費事睬佢! 呢個世界真係咩人都有!

之後有d不知名o既女子, 咩又“大師妹”又“小師妹”…是但啦, 都係Albert Au想捧o既妹妹, 咁都算做唱得幾好…可惜佢o地唱o既歌一d都唔識, 毫無共鳴可言!

仲有個話係“天作之盒”主題曲-“愛是沒保留”o既原唱者 (但唔係林志美喎!)…呢個妹妹就真係唱得幾好…隻歌聽聽o下亦都幾好聽!

個演唱會去到後半部都叫做精彩o左d, 起碼平時佢演唱會core會出o個d嘉賓: 佢個妹區桂芬, 鄧慧欣, 李秉文等已唱晒…之後有d比較驚喜o既例如柳影紅, 伍衛國, 顏聯武, 鮑翠薇etc., 都叫有d新意!

好彩呢個係群星拱照Albert Au演唱會…如果唔係齋聽佢實悶死!