8-6(wed) HKCEE

又到o左會考放榜o既日子, 今晚一開電台, 全部都係通宵陪你放榜節目!

都有好幾年無聽過呢d節目, 雖然偶而都會好關心呢d會考o既新聞; 但係因為距離自己會考o既年代愈來愈久遠, 所以一年比一年無“投入感”! 曾幾何時 (我諗係由F3起至Year 1倒啦)…年年接近呢個放榜時節, 都會好關心呢d新聞, 又睇“睇真d”, 又聽新聞, 仲有一定年年都聽呢d“陪你倒數”節目!

我知係幾無聊o架啦…年年d主持都係柴娃娃咁同d聽眾講埋d廢話, 甚至叫d會考生上o黎做直播玩通宵, 仲好似試過移施去沙灘度同d考生玩番晚添 (我記得當年我o地係同當時唔算太出名o既“商台o靚妹dj”-芝see菇bee同一屆會考o既, 所以商台亦都好順理成章咁幾乎成晚o既節目都係“陪佢+陪所有會考生”等放榜…估唔到短短幾年間, 佢已經成為香港其中一個最出名o既dj!) …但係可能我除o左係一個電視迷之外, 仲係一個“會考迷”(呢個term我都係第一次聽, 但我又真係覺得幾貼切喎…o係o個幾年, 咩會考related o既o野 [除o左會考課程本身o既內容 ^v^!] 我都會睇一餐)!

當然, 呢幾年個人可能真係大o左喇, 而會考又真係太遙遠喇…所以對呢d節目o既熱衷情度亦都減低o左好多! 今年再偶然聽番呢d節目 (聽o左一陣都唔係好頂得順, 走o左去做第二d o野), 真係好似好事不關己咁 (咁確實係好事不關己o既…但係以前就算唔係自己放榜o個年, 都會好似好關自己事咁o架喎!), 仲要係d人講來講去都係d咁o既o野, 少不免有d煩! 再諗?…原來距離我們會考的日子…己經有7~~~~~年喇! 嘩! 話咁快…真係唔認老都唔得!

記得當年o既呢個時間, 的確係有d緊張o既 (雖然我個人不嬲都算比較“天跌落o黎”o個批)! 當日o既tea time開始同d同學去唱k, 之後好似去o左食飯, 跟住就係返屋企囉…無咩興趣去玩通宵! 本來諗住早d[目訓](我o既“早”係指兩點倒啦), 但當然係[目訓]唔著啦! 好鍾意無o野搵o野o黎搞o既我, 居然唔知發咩神經…忽發奇想諗住fax去電台俾個驚喜d同學仔!

o個個年代o既我通常都係聽商台o既 (依家隨住年紀o既長大, 已經轉o左去聽官方電台幾年喇), o係深夜一點幾有個節目係歐陽德勛主持o既, 好似叫咩“勛(fun)-der land”(講真…真係唔係好知佢個節目名點打?!)…咁o岩聽到佢講關於會考, 咪膽粗粗寫o左張fax過去, 講d懶勉勵o既說話同埋 (最主要係) 點歌俾d同學仔囉! 我第1次咋…等佢讀出o黎o個時個心仲“卜卜跳”添 (都唔知緊張d咩?! 又唔係打電話去, 又唔洗我出聲o既…不過“17歲”卜卜脆嘛…係咁o架喇!)! 又好驚俾屋企人聽到, 所以都唔敢開得好大聲! (雖然又唔係d咩唔見得光o既o野, 但又確係唔想俾阿媽知嘛!)

阿德勛哥哥仲話佢個節目本來就唔接受點唱o既, 不過見o個日係會考前夕, 破例幫我讀個fax (之後佢仲讀o左另外幾個fax添…至於佢係咪真係不嬲有唔讀fax o既慣例, 就真係無從稽考, 因為我不嬲都無聽開呢個節目…o個日只係咁o岩得咁橋! 反而佢之後走o左過港台主持“輕談”, 我就真係有成日捧場…仲偶然會fax去點o下歌添!)! 好彩我呢個fax都無白廢…當時居然真係有同學仔聽到喎, 仲即刻打電話俾我添! 我記得我o個時仲有錄低o黎俾番一部份“被我點名”的同學仔聽番…依家餅帶仲o係我屋企!

本來淨係諗住講幾句關於會考o既o野, 點知一打就打o左成篇文…真係無得救! 不過依家諗番起當時所做o既“無聊”o野, 確係有d無聊, 但又的確係“卜卜脆”時先會做d咁有心思o既o野! 如果你仲覺得依家o既我鬼馬, 我可以話比你聽…相比起以前, 依家o既我已經悶蛋o左好多!

又係o個句…真係“記得當時年紀小”!

(Btw, o係打緊呢篇o野途中, 我已經o係唔同o既電台節目聽o左至少3次華哥隻“17歲”…果然係hit呀?! 又或者可能係因為o岩呢個時節啦…會考生都係around呢個年紀o架啦!)