4-24(thurs) 戀上口罩

呢幾日開始熱番少少, 亦可能因為呢單o野已經搞o左幾個禮拜, 所以市面上好明顯少o左好多人帶口罩! 但當大家相繼離棄佢o地o既時候, 我卻戀上了我的口罩!　好鍾意遮ｏ左半塊面ｏ個種“你在明, 我在暗”o既感覺…深信一路帶住“面具”, 一路口中唸唸有詞話:“你睇我唔到, 你睇我唔到…”, d人就真係會認我唔到! (雖然一個個事例已經切切實實咁話o左咩我聽…我帶o左面具之後, 仍然係會俾人認出) 我係天真o架喇…唔得咩?

不過除o左一廂情願咁以為人o地見我唔到, 沾沾自喜咁覺得好似帶o左頭盔咁好有安全之外; 口罩真係仲有好多實際好處…難怪只係同佢相處o左短短一個月, 我就已經對佢培養o左深厚o既感情! 既可以增加人與人之間o既神秘感; 又可以o係我行街街自言自語時…唔洗俾人發覺, 更唔洗俾人聽到我講咩 (當然我個口郁o既幅度都唔係好大); 仲有就係當我忽然想跟住音樂引吭高歌唱:“wo-oh-oh-oh無心睡眠…wo-oh-oh-oh腦交戰”o既時候…都唔洗俾人聽到我咁動聽o既歌聲嘛!

因此我好希望帶口罩呢個trend可以繼續落去…不過之後再熱d, 我諗我真係會頂唔順…熱到生熱痱!

除o左戀上口罩, 我諗我仲戀上o左80年代o既張國榮!

一日到晚係咁睇佢d特輯, 演唱會, MTV, 舊劇集…總之係咩都有殺錯無放過! 連家人都睇唔過眼話:“你日又睇, 夜又睇…究竟睇完未? 你真係好鍾意張國榮喎! 如果唔係因為哥哥死o左, 根本我就唔會有機會睇番佢咁多以前o既片段, 咁又點知佢又真係咁正呢?! 畢竟o係佢大紅o既80年代, 我只係一個幾歲o既小朋友…又點會識得欣賞呢?

從來睇電視劇我都係會留意女角多過男角…但今次密集式睇番哥哥o既舊劇集, 我居然破例地目不轉睛咁望實o係唔同階段有唔同o既“靚”o既哥哥…不禁讚一句:“真係好型!”

之前話記憶之中o既“甜甜廿四味” 唔係咁好睇, 但呢排由頭開始追看…發覺我呢個觀感係完全錯o左o既! 喂…真係好cutie喎! Exactly 係我最鍾意睇o既青春劇, 仲要其中一pair主角 – 哥哥同倪詩蓓…真係幾賞心悅目! 故事都係o個d啦…但係無可否認, 我對80年代初o既“麗的”青春劇確係有種情意結…佢成個style, 選角 (其實來來去去都係o個d…亞視有幾多人呀?), 故事情節, 趣怪主題曲, 甚至片尾上字幕o個隻獨一無二o既手寫字體, 都係我杯茶! 之前提及過o既有“IQ成熟時”,“青春三重奏”,“再見狂牛”,“愛情跑道”等…全部都有種喜出望外o既新鮮感, 但亦包含o左“麗的”青春劇獨有o既親切感! 正!

所以我向大家推介:“甜甜廿四味”! (不過中段鍾保羅個角色忽然變o左莫少聰做, 就真係超級怪…接受唔到!)