7-27(sun) 17歲

華哥呢期果然係“好歌有好報”! 繼“人善天不欺”之後, 尋日o係電台聽到佢o既又一力作…一首更加可歌可泣o既“自傳歌”- 17歲!

第一次聽o既時候係只係聽到後半part…驟耳聽都幾係難聽 (主要指o既係華哥o既演繹, 尤其係高音部份…sorry!), 仲有d“娘”添! 不過中段好hard sell地加o左“一起走過的日子”o既intro音樂, 我反而好鍾意喎…娘就係娘d, 但係都已經“娘到一個唔娘o既地步”!

點知過o左唔夠一個鐘, o係另一台o既流行榜又聽到同一隻歌! 認真咁聽吓隻歌…其實又真係唔錯喎! 尤其係個idea, 簡直係絕呀…攞自己o既故事o黎做主題, 淨係個gimmick都夠煞啦! 首歌本身個旋律都唔錯, 幾warm, 幾“kum”聽; d歌詞就更加唔洗講, 簡單咁講出o左全港人都略知一二o既“劉華的故事”, 對一眾陪住佢成長或佢陪住我o地成長o既香港人…絕對可以引起共鳴!

D歌詞又簡單又寫實 (尤其係大部份句尾都押韻), 係就係第1句歌詞就有d唔o岩音…但都算交足功課o架喇!

最鍾意一開始o個段“17歲那日不要臉參加了挑戰… ”, 仲要講埋四哥 + 發哥…幾抵死呀! 第2段o既“29歲頒獎的晚宴fans太瘋癲…”亦都填得唔錯呀…佢29歲o個年o既頒獎禮, 正是佢第1年攞到“最受歡迎男歌手”o既“1990年度勁雞金曲頒獎禮”…好寫實呀!

仲有o個句“我的震音假音早已太熟練”…真係笑死我! 唔知佢係真係覺得自己o既“震音假音”真係好熟練呀?! 定係好抵死咁自嘲緊佢早期成日俾人取笑o既“學哥哥腔但未到家”o既“粵曲唱腔”呢?! 總知我覺得好好笑!

但係一到chorus就變得好悶喇…我真係唔知佢一共唱o左幾多次“唱情歌…”?! 好鬼repetitive…可唔可以寫多幾句唔同o既歌詞呀?! o徙o左隻好歌!

到臨尾佢都不忘提o下自已d經典歌曲…但係既然都用o左“一起走過的日子”做過場音樂咯, 點解唔提埋呢個歌名呀? 仲有“神鵰”,“獵鷹”, 甚至“無間道”呢d經典代表作…全部關於佢o既都放晒落去, 個效果應該會更加好添!

雖然首歌略有不足, 不過我真係覺得佢可以話係華哥近10年o黎o既好歌 (尤其比起佢近5年來o既“垃圾歌s”)…好在“每一首歌一個故事”嘛, 勝過其他大路歌詞好多! 攞自己o既故事o黎做主題…我鍾意! 華哥, 你係得o既!

亦都證明 "17歲"…唔係淨係for當年“卜卜脆”o既林志穎; 用o係年過40 o既華哥身上, 都仍然好貼切呀!

雖然我從來都唔係華哥o既fans (縱然我會得閒拿番佢10年前現場跳“獨自去kowloon” o既錄影帶出o黎回味…但主要原因都係因為佢o既“炒餸”舞步太搞笑!), 不過我都好欣賞佢o既努力同埋敬業樂業o既, 加上佢對d fans應該真係幾好, 都算係娛圈少有o既“好人一個”呀!

今次我真係要極力推介佢呢隻抵死“17歲”(本人都反覆聽o左好多次, 真係幾唔錯喎!)…我覺得直頭可以取代o個首“顯給你”, 做“華仔天地”o既會歌!