3-29(sat) “要死活不來, 要活死不來”

香港人o既不安情緒已經到逹o左一個一發不可收拾o既地步. 坦白講, o係香港生活o左廿幾年, 我從未見過香港咁人心徨徨; o個種恐懼唔再只係內心o既不安, 而係充份表露埋o係塊面度 (雖然依家o係 “一人一面具” 之下, 大家只可以見到其他人對眼)! 香港所瀰漫注o既呢股恐懼, 無可否認已經到o左一個好唔健康o既地步; 所以我覺得政府除o左要諗辦法去根治+防止呢個病o既傳播之外, 最重要係去幫香港人醫心理, 因為心理因素絕對係對抗病魔o既重要一環!

無錯, 我本來真係好驚, 但呢兩日已經到o左 “驚到唔驚” o既地步; 尤其係當所有身邊o既人都幾乎驚到唔敢出街, 一切日常生活都被迫改變晒, 好似無晒人生樂趣咁! 我真係唔想咁樣, 亦都明知愈驚就愈對成件事無幫助; 因為根本唔知d病菌o係邊, 根本係防不勝防…再咁落去只會“驚”+“屈”到痴線!

唔通我真係成個月屈o係屋企唔出街咩? 咁亦都唔可以百份百防止被感染, 因為我o既家人仍要繼續返工, 我的家傭亦都會照舊o黎我屋企…根本無得避! 所以我前幾日睇報紙見到陳淑蘭唔知引述邊個人 (真係唔記得之前聽邊個講過, 如果知道o既人請告知我!) 講話: “要死活不來, 要活死不來!”, 我真係萬分認同囉…好多o野真係整定, 亦唔知可以點避?! 再驚落去, 只會令所有香港人崩潰!

我唔知點樣可以令大家減低呢個恐懼情緒…如果知, 我都已經走o左去向阿董生顯計, 做其特區高官啦! 不過, 我某程度上係認同香港d新聞係過份喧染呢件事; 唔可以話佢o地好誇張, 但係日日咁公佈o個d數字同埋邊個邊個地方有人“lai” o野, 確係令人愈睇愈驚! 其實報導新聞o既方法有好多, 既然香港人o既恐慌已經去到呢個地步, 可能真係要適量減少呢d報導o既篇幅同埋攞一個唔同o既報導角度!

我呢幾日都有照出街呀, 仲去o左最多人流o既旺角同埋銅鑼灣…我驚o架, 不過唔驚得咁多; 唯有帶番個口罩等自己安心d囉! 我仲o係等緊人無聊o既時候, 影o左好多香港各地區 “一人一面具眾生相”, 等其他唔o係香港o既朋友, 可以睇o下依家香港難得一見o既“戴口罩熱潮”!

今日去旺角見到d好有生意頭腦o既香港人擺晒檔攤去賣各款各樣o既口罩, 本來想影低佢俾大家睇…但係費事俾人打啦, 所以最後都只係去“趁熱鬧”…無影到, 亦都無買到! 呢期去街, 雖然條街同以前無分別, 但總係覺得乏味好多; 可能真係因為整個大氣候o既影響, 令到周圍 “死氣沉沉”! 原來“主觀o既心情”, 絕對會影響 “客觀o既事實”!

基本上, 依家o係香港人人o既話題都離唔開呢件事; 去食飯又講, 搭車又講, 開電視又講, 睇報紙又講…我實在覺得夠喇…好煩好煩! 所以我希望o係今日之後, 我唔洗再o係日記講呢件事; 聽日一定要講番d開心o既o野…願明天會更好!