1-17(fri) 金曲25年

今日好勁呀, 我居然可以排除萬難 (萬難包括本人間新房間再次上唔到網, 亦唔知幾時可以上到…), 偷偷咁走o左入CC, 再發現真係可以o係CC用headphone聽電台; 因此居然能夠同所有香港朋友同步咁現場收聽十大中文金曲 (不過我相信我D o係香港o既朋友無咩邊個係會live去聽呢D頒獎禮)…感覺好正囉!

我就係咁神不知鬼不覺地坐o左o係個CC 3個幾鐘, 塞住耳筒係咁聽…o係香港時都冇咁神心呀! 中文金曲o既賽果一向都係不外如是, 唯一特色就係會搵D 9唔撘8o既運動員, 政客呀咁去頒o下獎; 同埋十年如一日咁“造” 個傳媒大獎俾華仔…不過我又覺得ok喎, 畢竟年年o既頒獎禮都係一場遊戲, 你唔好造得太核突就得啦!

反而STAREAST o個幾位老闆仍然樂此不疲咁出席所有頒獎禮, 去換取旗下o個D EO2, SISI, EKIDS得獎…就真係令人有D頂唔順! 仲有阿好勝GIGI隻 “高妹正傳” 仍不停借克勤首 “高妹” 個勢去攞獎就真係幾唔likey囉…佢唱得好好好鬼難聽呀! 仲有佢今日唔知係“懶” 搞笑, 定“懶”恃熟賣熟咁叫人o地俾o左個獎佢...又不停高聲叫喊話自己未多謝完等舉動…就真係好鬼死失禮人, 希望佢下次收斂o下啦!

至於臨尾o個D咩銀禧大獎, 都OK o既…係阿華仔作為其中一位得獎者, 但係今時今日仲同D o靚仔o係度爭緊D金曲獎, 就有d諷刺囉! 而最後大合唱番首“獅子山下”, 有D娘…好官方電台FEEL! 不過o個種 “眾志成城” o既感覺我一向都好buy (所以我咁喜歡舊年首“同步過冬”)…所以我又會接受到o既!

今年本來好想去現場睇, 事關佢25周年一定有d大搞作…精美場刊加精彩節目,好吸引; 仲要o係特別場地舉行, 我最有興趣去睇o下o架啦…點知已經返左英國開學! 唔知點解年年我好想去o既大型戶外節目, 都會因為唔同o既原因而去唔到…好似今年o係沙田馬場舉行o既中文金曲啦, 1999年除夕港台o係跑馬地馬場搞o個個迎接千禧大型節目啦, 1996年o係大球場舉行o既叱咜啦…次次o係呢D特別地方搞o既我都去唔到…反而o係紅館搞o個D年年如是o既show就睇過無數次!

記得20周年o個時, 我都有同同學仔一齊去. 當時係我第一次現場睇中文金曲, 都幾精彩o下…因為除o左o個年d金曲外, 仲有d廿週年特別獎, 好多o野睇, 由8點做到12點…好抵睇! 仲要係我o地一行出紅館, 居然撞o岩成班歌星行出o黎去慶功宴…咁梗係 “賴死唔走” 咁霸個好位去睇明星啦…見到東東呀, 千嬅呀, 霆鋒等等 (其實唔係好記得exactly仲有d咩人囉…係呢幾個比較深刻! 因為o個期幾鍾意東東…d歌幾唔錯o下… “心理遊戲”, “結他”, “愛妳躲你”, “猜猜猜” 等; 佢o個期出o既精選 AVCD亦係我唯一買過佢o既碟, 聽到依家都仲聽緊o添! 仲有佢套好cutie o既 “初戀無限touch”…我覺得佢o個期真係幾掂! 至於千嬅, 亦係o個期最鍾意o既…覺得佢好得意, 個人好真…依家嘛…um…! 仲有97年佢有首大熱 “再見二丁目”, 亦係我o既心水選擇! 當年見佢拿“飛躍進步獎" 已經好戥佢開心, 反而依家拿慣大獎仲無咁“矜貴”! 霆鋒嘛…當時佢攞新人o既霆鋒俾人 “hur” 到7彩, 同今日o既 Juno有得揮…見佢咁…反而幾係同情!)…估唔到, 原來唔止十年人事幾翻新…五年人事都可以好 “翻新”!

記得當時返到屋企仲好意猶未盡, 繼續聽收音機, 上網咁睇o下d 關於中文金曲o既資料…好少現場睇完頒獎禮會會咁興奮! 之後禮拜一返到學校仲繼續同d同學discuss 個頒獎禮…須知道探討娛樂新聞係我同同學仔o係F7 o個年o既校園生活非常重要o既一環! 每日一返到學校, 我o地就拿住份“半被迫” 訂閱o既明報, 抽出娛樂版慢慢研究 (其實明報娛樂版係ok好睇o架喎, 但當然冇生果或依家o既太陽咁有娛樂性啦…但絕對唔boring!), 為我o地最後一年o既中學校園生活增添o左唔少樂趣!

本來今日冇緣去睇已經好氣結o架啦…點知返到hall收到阿媽電話, 佢居然話頭先親身去o左現場睇中文金曲, o岩o岩先返到屋企喎…實在太過份啦! 明知人o地好想好想睇o架嘛…點知我無得睇o既時候, 佢居然話俾我聽有人請佢去睇…想睇o既人又冇得睇, 唔係特別想睇o既人又居然有貴賓飛…真係唔公平!

不過算啦, 俾我發現到可以o係CC聽直播, 又可以遲d上網睇番足本重播, 仲叫埋同學仔幫我錄影…都已經好alright啦…世事又豈能盡如人意呢?!