1-5(sun) 2002年度勁歌總選review

一如大家所料, 今年o既勁歌頒獎禮賽果無咩特別驚喜; 男女歌手都係 “大熱勝出”, 連佢o地自己得獎o既反應亦比想像中平淡…同舊年“廚房宣言” o既震撼同驚喜程度簡直無得比!

第20屆o既十大勁歌終於無驚無險地舉行完畢…唯一特別o既係: 以前我只可以私底下同d朋友discuss o下個賽果, 今年終於可以有自己o既小天地去同所有人發o下我o既o翕風啦…

依家唯一o既感覺就係有d “dum” 心囉…尋日差d想上網“落注” 買最受歡迎男女歌手 (因為其實都幾“坐定粒六”); 但係又嫌佢要開戶口好麻煩, 同埋驚萬一真係輸o左我會好肉痛, 所以最後都係放棄o左…如果唔係, 相信我依家可以請大家食餐勁o既!

不過算啦, 係你o既就係你o既…我驚一開左個頭, 仲要贏埋…反而會害o左我o添…令我走上 “不歸路”…變成 “職業賭徒”! 再加上如果忽然 “撻Q”, 唔單只輸o左d 錢, 仲要輸埋 “牙胶”, 再加上見到自己支持/睇好o個個歌手輸o左o個種失落感…多重打擊…會好唔開心o架…所以置身事外可能比較明智o既!

今日6點幾去完黃埔搭車經過紅館, 見到有d fans結集o係門口, 仲有架tvb採訪車…我仲o係度諗今日邊個開演唱會呢, 後尾先記得原來係 “勁歌總選”…諗起自己幾年前都有去現場睇, 但反而o係電視機前面睇得仲投入…可以全家人不顧一切地吶喊嘛!

宣佈男歌手時, 一向好支持克勤o既我緊張到企埋起身…真係緊張過自己[手羅]獎...克勤o既反應實在比起上年o既安仔平淡太多啦, 講o野亦都唔夠到肉同感人…其實佢可以煽情好多o架…可能係因為賽前太大熱啦, 連佢自己都少o左一份驚喜…亦令觀眾少o左上年o個份出奇的感動! 不過見到克勤繼 “深深深” 年代再o係勁歌頒獎禮吐氣揚眉, 唔洗再只係 “陪人玩”…真係有d感動!

唯一唔明點解就係佢唔係入“高妹”, 反而入o左 “愛不釋手”…我諗唯一o既解釋就係為o左要造就gigi隻 “高妹正傳”囉 (真係估唔到好勝gigi有機會鹹魚翻生到呢個地步) ! 但係好明顯“高妹” 係好聽過 “高妹正傳” 好多…gigi的歌藝仍然恐怖, 尤其唱d咁高難度o既歌o既時候…可能佢作呢首歌o既時候, 無諗過隻歌會hit到自己[手羅]番o黎翻唱啦!

不過, 都不得不讚o下佢o地兩個呢個 “mutually beneficial” o既idea…好有諗頭, 好有gimmick…見首歌hit就整多一個version, 仲要係呼應番原本個version…可以起到互相宣傳之效, 可謂互惠互利! 醒目!

至於最受歡迎女歌星楊千嬅…雖然依然又喊又笑, 但係已經比起 “叱吒” 乏味好多, 可以話有d平淡o添…唯一比較搞笑o既地方係拿“廚房宣言” o黎玩佢! 而其實楊千嬅幾有腦, 講o野仲好有point o添 (只要你用心去咀嚼佢講o既每一句話)…provided佢唔係失控地又喊又笑o既時候!

另外就係要讚o下TWINS, 佢o地d live真係唱得好o左好多, 尤其係阿嬌! 佢o地現場唱 “風箏與風” 居然都出奇地ok, 而唱“愛在深秋”亦居然無甩咀同走音…比起上年好o左十倍…我好impressed囉! 唯一美中不足係佢o地同“F2” 真係好九唔搭八, 仲要一齊唱譚校長o既“愛在深秋” 就更加奇怪!

而最頂唔順o既野就係STAREAST o個堆咩EO2, E-KIDS, SISI, TIFFANY, BOBO…全部好明顯都係因為志偉 + 阿叻 + 校長全部出晒o黎幫手做個頒獎禮而可以個個都交換到個獎...真係唔明點解佢o地3個會捧呢d人…全部都唱得超難聽!

華仔o既年年“咪咀” 舉動亦都係好失禮人…佢d歌好明顯愈唱愈差, 仲要疏於練習, d歌o既質素又每況愈下…我都係buy佢 “一起走過的日子” 或者 “獨自去偷歡” o既年代! 依家o既佢…都係留番去做戲吧啦, 因為佢依然型仔…但係佢o既歌藝就…!

至於JUNO, 反而有d戥佢慘…雖然佢真係幾樣衰, 但都真係好耐無見過d人俾人“噓” 得咁勁…令我諗起“奪麵雙琪” 年代o既梁詠琪 (但佢依家居然翻到身) 或者當年o既霆鋒…但霆鋒條件好咁多, 點都容易翻身d呀, 至於JUNO…其實佢唱得唔錯o架喎!