3-27(thurs) “疫埠”…我好驚呀!!!!

無錯, 我確係已經返o左o黎呢個 “疫埠”— 香港!

點知人算不如天算, 我居然 “lai” o左o野, 喉嚨痛 + 傷風…平時感o下冒係好小事, 但o係呢期感冒就真係唔講得笑…好驚呀!!!! 我會唔會死o架? 真係好驚呀! 依家人心徨徨, 每日睇新聞都有更驚人發現…我諗我都係唔好睇新聞好d喇! 講真, 我覺得對我o黎講, AP (ATYPICAL PNEUMONIA) 比起打仗o黎得更恐怖, 更切身! 直頭好似每日出街都搵自己條命o黎博咁…真係好驚好驚呀! 咁大個人都未見過香港好似有瘟疫咁, 人人自危! 以前帶口罩出街會俾人當怪獸咁望, 依家你唔帶口罩反而似怪獸!

香港似乎已經去到“係咁大” o既地步, 而我…真係好驚…普通感冒咋嘛? 你真係唔好嚇我喎! 我唔想死得咁不明不白呀! 第一次覺得有d後悔返o左o黎囉…雖則話“該死唔洗病”, 但係我就好似自己無啦啦走返o黎個“疫埠”咁, 同自己撘飛機去伊拉克有咩分別呀?

呢個禮拜裏面我真係經歷o左好多畢生難望o既事情: 好似開戰第2日居然夠膽o係英國撘飛機返o黎; 仲要係o係人人疑不得快d離開呢個 “疫埠” o既時候, 我反而飛o左返o黎…真係覺得自己有d痴線! 不過都買晒飛啦…整定o既! 都係唔驚得咁多o架喇!

返到香港如果唔出街, 又真係超級無意思, 因為香港最正o既o野就係佢o既多采多姿生活嘛…依家搞到連街到唔敢出…好無癮! 本來諗住去o下中央圖書館, 依家又話有員工感染o左AP要關閉…咁我可以去邊度呀? 唱k更加唔敢諗啦…呀! 人生真係無晒樂趣…尤其當你每日活在恐慌中, 點算?!

依家我出街都會盡量帶番個口罩(但其實帶一陣已經好焗, 仲要自己吸番自己d菌添!), 更加要增強自己o既抵抗力, 瞓多d…唔係再咁繼續感冒落去, 我自己唔驚都嚇怕d friend 啦!

在此希望呢個 “世紀疫症”可以停止漫延, 仲有係可以搵到醫治o既方法; 唔好搞到香港咁人心徨徨, 瀰漫住咁愁雲慘霧o既氣氛!