1-4(sat) 勁歌總選前奏

本來有好多其他o野想講, 但因為聽日就係 “十大勁歌金曲頒獎禮” o既大日子, 點都要o係呢度用一d篇幅講o下! 今年仲要無啦啦提早o左o係1月第一個禮拜日舉行 (以往年年都係 “1-1-幾” 舉行o架嘛), 令我可以o係番去英國之前睇埋個頒獎禮先…因此我絕對相信tvb係為o左俾面我呢個長期fans (大家唯有認同我)…所以我亦都要俾番面tvb去落力談論o下佢!

正所謂“頒獎禮大過天”, 除o左台慶同東華之外, 勁歌頒獎禮對我 (甚至我家人) o黎講, 絕對係一年一度o既盛事! 以前細個甚至會特登唔出街食飯, 留o係屋企全程睇晒成個頒獎禮; 亦都試過有兩年去紅館現場睇, 但係經驗話俾我知…o係電視睇絶對好睇過去現場睇, 皆因佢成個show根本就係for電視直播, 好少照顧到d現場觀眾…留o係屋企睇仲睇得清楚!

講番今年o既頒獎禮, 絶對希望 + 相信 “最受歡迎男歌星” 會係克勤o既囊中物…畢竟佢今年都形勢大好, 而且佢都好慘地陪人玩o左咁多年 (尤其o係 “四大天王年代”, 佢每年都有份 o係o個d “揭啤牌” 或者 “開鎖匙” 環節度幫四位天王 “戥腳”); 正所謂 “無功都有勞” 嘛! 再加上佢今年d歌都唔錯呀 (我沒有六呎高, 但我會待你好…) …雖然同佢d “食老本” 歌仲係冇得比, 不過都好過前幾年o個d好多!

而無線呢期幫克勤力谷人氣o既舉動亦都有跡可尋; 無論大小show, 直播, 錄播或者重播o既節目, 都可以發現克勤o既蹤影…就算唔順眼都睇到變順眼 (而確實 “人紅自然順眼” o既道理亦都apply 左o係克勤身上…其實克勤都算ok好樣呀(雖然我上年年頭咁講o既時候, 居然俾我d同學笑到我面黃!)!)

呢兩個禮拜裏面, 差唔多每個tvb o既節目都會見到o下克勤…例如無啦啦又見佢出現番o係“香港做得到”; 夜晚睇d深宵重播節目, 又見到重播佢主持o既“叻人新世紀”; 連朝早6點重播o既“同居三人組”, 都特登o係呢期播番有佢份演出o既部份, 好明顯係要為克勤做勢! (btw, 當年我都好鍾意睇呢套劇…克勤當年真係幾有型健康靚仔! 不過雖然我buy克勤, 但當年睇呢套劇o既時候, 我都係支持郭晋安配梁佩瑚多d! 記得當年約10歲o既我好鍾意梁佩瑚, 覺得佢好cutie, o個時仲o係南華會間酒樓見到佢, 好鬼死開心o添; 但係10多年後o既2001年, 己經長大o左o既我再o係hku見到佢, 一d興奮o既感覺都冇, 反而有些少 “鄙視” o既感覺…事關我呢個當年的 “偶像”, 咁多年都冇變過…仍然係完全冇腦, 仲要claim自己讀緊law…可以話係咁多個走o左去讀law o既藝人裏面最冇說服力o既一個!)

再加上無線一向要搞驚喜, 上年撮合sammi同安仔一齊攞最受歡迎男女歌手己經係一個好例子, 亦成功地製造o左好多話題; 今年頒呢個獎俾等o左咁多年, 鹹魚翻生o既李克勤, 相信亦都可以有一定o既迴響!

至於最受歡迎女歌手, 相信會係楊千嬅…原因並唔係因為我鍾意佢 (況且自從佢成日不受控制瘋狂地又喊又笑之後, 我已經無咁鍾意佢), 而係因為我另一個偶像sammi 應該唔會出席; kelly拿o左咁多年都唔會再有咩驚喜; 至於有傳話英皇正為twins力爭做出道最短時間攞到最受歡迎女歌星o既歌手…晤…我仍然相信千嬅機會大d!

金曲金獎都會係“好心分手” 啦, 同場加映鏡頭不停咁影去余文樂度, 加埋candy聲嘶力竭咁邊唱邊喊…娛樂性十足!

至於新人獎, 頒成幾廿個, 人人都有份啦; 我諗男女新人金獎會係juno同yumiko (雖然我prefer關心妍多d, 但係yumiko都可以接受o既)…不過講真, 我真係覺得王嘉明唱同跳都幾好, 個樣都好過juno好多呀, 唔知點解佢下半年忽然無晒聲氣?! 新人組合…唔係cookies就係shine啦, 無咩好估…仲要4個組合爭金銀銅獎, 我諗最後係會皆大歡喜咁俾兩隊E-咩 (應該係EO2 同 E-KIDS…明明舊年已經見到EO2出現o係d金曲拉票, 唔知點解佢o地今年又可以再角逐新人?! 更加唔明點解譚校長要一年捧兩隊咁騎呢o既組合, 咁點去爭呀?!) 一齊拿個銅獎囉!

其他N個獎, 都無謂去逐個評論啦…當然一定會分番幾個俾“無線人” o既, 好似馬浚偉同埋陳慧珊咁; 但係我諗就算分豬肉, TVB都會分得好睇過新城o卦?!