11-21(thurs) 欲罷不能 ---“喝采”

今晚上完堂同d同學仔去o左一間o係Trafalgar Square o既church裏面o既餐廳食o野; 呢間Christian Church都幾特別, 居然有concert聽, 又有地方食o野! 好鬼夜先番到hall, 當然又係上唔到網啦…已經唔知第幾日啦, 我一定要寫封email去叫佢o地回水!

前幾日又因為上唔到網, 所以搵d VCD出o黎睇! 正因為想留番我最鍾意o既“IQ成熟時” o係最尾先睇, 所以決定開我帶o黎o既最後一隻電影VCD; 貪佢個幾鐘睇晒, 唔洗 “吊住癮”! 而呢隻壓軸o既VCD, 就係同“IQ成熟時”同期+同STYLE o既 …“喝采”!

N年前o係HMV見到大減價到$15一隻, 已經心郁郁想買o黎睇o下, 但最終都miss o左個special offer, 最終又冇買到! 今次o黎英國之前又再度大搜尋各類"cutie" VCD, 終於又俾我見到一間同樣賣佢$15 o既舖頭, 立即毫不猶豫咁買o左落o黎!

可以話係唔睇由自可, 一睇真係不得了…係鍾意到不得了! 好鬼cutie, 同“IQ成熟時”有異曲同功之妙, 咁當然“IQ” 又再好睇d啦…電視劇始終有多d“漿力”! 同樣係我好鍾意o既片種, 青春勵志劇再加好好聽o既歌, 同埋粒粒巨星…又Danny仔, 又哥哥, 又鍾保羅, 又翁靜晶…仲有俞琤, 阿旦等客串…簡直目不暇給! 睇完之後令我好鍾意佢首主題曲“喝采” (o係劇中係話Danny仔自己作o黎參加歌唱比賽, 但唔知點解叫o左做“鼓舞”), 仲有“眼淚為你流”…睇完即刻走去download o左好多Danny早期o既歌, 好聽到不得了!

以前唔明點解咁多大我o地幾年o既姐姐會咁鍾意陳百強 (記得阿千嬅同梁fing琪都話佢o地最鍾意Danny仔), 睇完呢套戲, 我完全明晒! 既靚仔, 又健康, 仲要有少少怕羞o個隻, 再唱埋冧歌, 仲唔冧死你! 可惜o係我認佢o既時候, 佢已變o左個“一生何求”或“一生不可自決”個滄桑/沮喪 look; 唔係唔好…就唔係特別討好囉! 其實我覺得東東o係“初戀無限touch”個感覺係有d陳百強o架, 連套劇個style都有d似; 不過Danny個形象就再健康d&討好d!

另一驚訝係 -- 哥哥o係呢套戲居然要做個 “反派”…唔係d大奸大惡o個隻(o係呢類青春勵志戲應該唔會有大奸角), 只係d衰同學囉…但好明顯o個時真係Danny仲紅過哥哥好多, 否則唔會有一個咁o既角色分配出現o左!

睇完呢套劇, 令我好有衝動去睇埋“IQ成熟時”, 但又好驚會一發不可收拾, 晚晚係咁“煲”!