6-30(wed) 鄭秀文看鄭秀文

今日我想講o下o既係上個禮拜5無線播o個個“鄭秀文看鄭秀文”特輯!

其實依家o既我已經唔係特別鍾意鄭秀文, 呢個特輯點解咁令我注意…就係因為佢主力係講番初出道時o既sammi, 亦都係我最buy佢o既時期!

黨員話佢o黎緊7月o既演唱會, 都係會主力唱番d舊歌; 所以可能因為咁, 佢今次呢個擺明為o左宣傳演唱會o既特輯, 都係”懷舊”至上!

佢呢個安排就當然o岩晒我心水啦, 因為我最鍾意鄭秀文o既時候, 亦都係佢初出道o既時候; 我諗大家都記得我講過o係英國時有一晚, 同個friend因為講“浪族闊少爺”而講足一整晚! 而我亦都曾經提過, 佢o個套“浪族闊少爺”我真係睇o左n次有多, 番睇再番睇, d劇情又尾背番上頭都仲得! 所以無線舊年因為克勤人氣急升 (或者應該叫“鹹魚翻生”更貼切), 即刻出番隻“浪族”vcd, 本來我都好有衝動去買番套做紀念, 但諗起我本身已經睇o左咁多次, 仲要已經有我親自剪輯過o既私人錄影帶珍藏 (千祈唔好問我借呢d陳年珍藏, 所有呢d錄影帶依家已經唔會再外借!), 所以最終都係無賣到, 費事又係得個擺字!



我o地都覺得o個時肥肥o地o既鄭秀文其實個樣靚過依家好多, 飽滿d精神d可愛d…依家直頭係變o左第二個樣, 唔只係瘦o左咁簡單…你話佢整過容我都信!

今次個特輯係由佢16歲參加新秀開始講起, 播番佢參賽o既片段, 再cross-over到16年後o既今日現場演繹一次當年參賽歌曲”乾一杯”! 幾有新鮮感o既!

當時o既佢就真係唔係咁靚, 但係到90年佢真正出道時, 其實真係屬於幾清秀o個類囉! 同埋佢係ok口齒伶俐o架 (注意: 唔等同咬字清色! 同埋我覺得佢係特登愈講愈”meh”o既, 因為佢以超meh音唱“叮噹”大受歡迎, 所以咪食住條水囉…佢所講o既咩潮唔潮州人有咩關係呀?!), 做戲又真係ok好 (作為一個新人o黎講, 直頭係好好!), 所以佢出”不來的季節”o個期, 我真係幾buy佢!



但係到o左佢以金毛強造型唱“叮噹”大紅後, 我又反而開始無咁鍾意喇! 第一, 多o左好多機會o係電視見到佢, 咁反而唔會覺得咁難得; 第二, 又係o個個道理, 太多人鍾意o既o野我就會唔鍾意! 同埋佢都唔再需要我去支持佢啦!

到近幾年o既佢就真係有d唔得…個造型怪, 講o野仲怪(唔係meh音咁簡單), d歌跌晒watt…所以話, 女人o既黃金日子真係好短暫!

睇呢個特輯睇得最開心o既原因係因為佢勾起o左我好多“童年回憶”! 除o左有播番sammi新秀o既片段之外 (呢一年o既新秀錄影帶我仲有keep住, 但係因為當時係用“細帶”錄o既, 要用d陳年“細機”先睇得番, 所以都10幾年無睇過!); 又有我睇o左n次o既“浪族闊少爺”片段; 最抵死係佢居然搵埋佢當年“週末任你點”o既拍檔阮兆祥上o黎講番當年o既趣事!

需知道我當年都真係好鍾意睇呢個音樂節目, 亦都係因為有佢主持, 所以更鍾意! 但係d節目咁多年都好少播番佢做“週點”o既片段, 所以好珍貴囉! (尤其係可能大家仲記得我o係呢度講過: 我其實係有一千零一盒佢主持“週點”o既錄影帶, 當日仲有克勤+華仔等做嘉賓; 跟住前幾年我有一日拿出o黎睇, 居然睇到餅帶斷o左…我真係“心突然的隱隱痛”囉…即使第二日要返9:30學, 我都要不眠不休咁想盡辦法去收補番餅帶先捨得走去?覺! 終於都要搞到成5點幾, 好彩搞得掂, 如果唔係相信我都唔會?得著! 可見d舊影帶對我o黎講係幾咁重要!)

如果今次鄭秀文演唱會真係主力唱舊歌, 咁就一定會好睇好多! 希望佢真係識得照顧o下佢d舊有支持者啦!