6-26(sat) 隔世追兇

呢個禮拜無線有兩線新劇上, 之前已經講過話好期待, 點知睇o左幾集之後發現原來比我想像中更加好睇!

尤其係“隔世追兇”…簡直要極力推介呀! 好精彩, 好緊湊, 好引人入勝…劇種好吸引, 劇情亦都唔錯, 演員更加演得入木三分! 郭晉安真係掂, 演技掂不在話下, 原來身手都唔錯, 個樣仲要廿年不變! 廿年前商天娥可能同佢做情侶, 依家居然要做佢呀媽!

呢套劇不停咁講番1984年, 1984年o既郭晉安已經差唔多開始參演“城市故事”, 但佢依家個樣居然可以無咩點老到…真係唔到你唔服!

仲有個劇情講番話佢要證明俾佢老豆許紹雄知佢係2004年o既人, 就話佢聽1984港姐冠軍係高麗虹, 跟住仲話一選完港姐全香港就會大停電, 然後到10點先會恢復供電!

84年高麗虹當選港姐我就當然記得啦…我仲記得o個時o係婆婆屋企同d表姐排排坐o係電視機前俾分…雖然當時5歲都未夠o既我又點識俾分呀, 但d表姐叫到, 我都有好落力咁去俾o架!

我諗亦都係因為咁, 令我develop o左個睇港姐俾分o既習慣, 到我11,2歲o既時候, 會落力到o係港姐總決賽o個日唔出街留o係屋企睇直播, 仲會迫埋屋企人一齊俾分 (不過佢o地睬我都傻!)…更加會特登走去太古城投票添! 我諗我呢個追捧港姐競選o既習慣, 絕對係因為由細開始受我d表姐影響…當然, 到無幾耐之後佢o地已經唔再睇港姐, 但我就愈追愈興奮囉!

但我其實想講o既係, 究竟當年選完港姐係咪真係全香港大停電呢? 點解我無印象o既? 定係只係為o左呢套劇o既劇情而作出o黎o既呢?! 有無人可以解答我呢個疑團?

另外o個套“1屋2家3姓人”都幾好睇…輕鬆小品…o個幾個細路都幾得意囉! 但係宣萱同馬德鐘就麻麻o地喇!

而呢期“皆大歡喜”又有鄭中基, 雖然無我預期咁好笑, 但點都要睇o下o既! 所以我呢排要一連追三線劇集, 真係好鬼忙! 好耐無試過咁樣追電視劇法! 但無可否認, 追電視劇真係一種樂趣, 亦都係一種寄託…真係追得人好鬼開心o架囉!

遲o下仲有奧運, 又有港姐, 仲有殭屍…咁多o野睇, 點算好呀?!