11-17(wed) 沒有你之後

好! 今日“我本善良”終於都大結局喇…睇少一線劇集, 慳番好多時間!

我本來對“天涯俠醫”o個隻劇種都幾有興趣, 不過同時段要睇“殭屍”(“殭3”無錯係幾唔好睇o下, 但基於當年呢個強烈情意結, 我都會睇埋佢…本來想講“殭屍”好耐, 奈何中途殺出套“我本善良”…所以要留番下幾期先講!) , 同埋d女角嚴重克人僧…有大眾都“見佢前面憎埋佢後面“o既梁詠琪 (雖然只係客串, 但已經足以令大家對呢套劇印象大打折扣), 同埋個樣係靚但唔知點解咁克人僧o既郭羨妮…所以即使d男角我幾buy, 都唔可以吸引到我為o左佢而放棄我o既“殭屍”! 或者我今晚返去錄一套睇一套, 試o下睇o下佢d劇情all唔“all-light”啦!

其實“我本善良”呢兩個禮拜已經無咁好睇…事關進入尾聲開始“死得人多”, 平均每日都要死一個…好怕睇d咁heavy o既戲!

而齊浩男亦都無之前咁型…好似傻仔咁俾齊喬正點, 我覺得根本係佢間接地一步一步咁推伊明向俾人整盲o既境地!

是但啦, 橫掂都完喇…永遠d戲都係中段最好睇, 到後尾就係因為睇開唔好o徙, 所以唯有睇埋佢!

當年o既溫兆倫, 的確係ok型o既…我呢期同d朋友講開, 原來有好多人當年都“迷戀”過佢, 有個朋友仲話當時知道o溫兆倫o係海外出o左本寫真集, 仲特登搵朋友幫佢o係第2度買番o黎添! 真係估佢唔到! 我最勁都係以$38元 (對一個無咩零用錢o既小六學生o黎講, 其實係好落本o架喇!) 買o左本“今生無悔”特刊 (呢本o野當時好hit, 我知有好幾個同學仔都買o左!)…但絕對唔係因為溫兆倫同邵美琪…o個套戲大眾都係buy黎明同周海媚!

仲有, 朋友燒俾我隻齊浩男精選碟, 好好聽…但只限於“沒有你之後”同埋“我是情痴”! “從未試過擁有…”都ok o既 (加埋佢o既獨特“尾音拖長”唱腔)…o個隻寫俾佢舊情人李麗蕊o既“我的sara”就幾難聽o下, 而其他歌就真係…同埋佢o既唱腔亦都…!

上個禮拜唱k又唱多一次“沒有你之後”…果然係重複重複再重複…不過個mv都拍得幾好! 可惜唔記得o左唱“笑看風雲變”同埋“歲月燃燒”! 仲有, 原來“心仍是冷”根本唔係呢套劇o既插曲…唔知點解我十幾年來都以為係?!