7-24(sun) "八十年代的美麗傳說-TVB當家花旦"之翁美玲

(又續前篇)

繼續講埋一代傳奇翁美玲先, 對於佢當年點解無端端會自殺, 多年來眾說紛紜…我細個時聽到o既version當然係佢為情自殺, 但個第三者居然係吳君如…我o個時o既反應係: 嘩嘩嘩! 唔係呀嘩?! 有翁美玲你唔要,居然揀吳君如?! 跟住亦都同其他人一樣, 鄙視o左湯鎮業差唔多廿年!

多年後家見到湯鎮業副尊容, 更加唔明點解翁美玲當年有咁多靚仔唔揀, 居然揀湯鎮業?! 須知道其實湯鎮業當年可以話係“5虎”之中最靚仔 (唔好“噓”我住…靚仔as in literally“靚”…其他o個d可能係型呀, 英偉呀, 討好呀, 咩都好啦…但係五官最精緻可能真係佢!)…當年直頭係“公認”o個隻, 個個都話佢係五虎中最靚仔, 連近期有一個四虎o既聚會, 佢o地自己都話當年最靚仔o既係…湯鎮業!!! 只係後期佢霉到咁款 [情況同蔡楓華有d相似], 個個都覺得佢唔掂, 仲要佢又無啦啦好似吹波咁款大o左十個碼…先令到大家忘記o左當年佢o既靚仔樣!

不過話雖如此, 靚仔唔等於大家會buy, 亦都唔等於會紅…因為男人唔同女人, “靚”未必太煞食…型或者man可能更討好…即係好似吳家樂當年出道成日俾人講到佢有幾咁“靚仔”…但咪又係紅唔起! 係唔知點解湯鎮業後期可以搞到自已咁…你係遭遇逆境…但都唔洗咁“pun peir” o架?! 你將依家o既佢對比番廿年前o既佢…相信無人會認得囉! 又邊有人會諗到廿年前o既“靚仔湯”, 會變成今日o既“肥佬湯”呀? 你睇劉華廿年後咪依然咁型…!


(廿年前的“靚仔湯”)


(今時今日的“肥佬湯”)

至於湯鎮業o係翁美玲死後o既經歷, 大家都應該略知一二…就算唔知, 都會估到係點啦…你累死o左全香港最紅最多人鍾意o既少男少女頭號偶像…行出街都俾人指住o黎打啦! 蔡楓華講錯一句話都可以俾人鬧足十年, 佢累死o左人, 唔俾人“tur”罵足廿年?! 不過我自從睇多o左關於翁美玲自殺前因後果o既文章之後…反而我d同情湯鎮業囉…就算佢做錯d咩, 廿年來o既dramatic遭遇, 佢都受夠啦?! 由當紅小生變到咩都無, 仲要一生活o係翁美玲自殺o既陰影下, 仲要時至今日都仲俾翁迷鬧緊…可謂比死更難受!

仲要係成件事o既結果, 我諗無人會諗到係咁…包括幾位當事人! 純粹係年青男女哎o下交, 一時賭氣之舉! 邊有人會諗到搞成咁呀? 其實我幾同情湯鎮業, 某程度上, 佢亦都係呢件不幸事情o既受害者…你估你女朋友無啦啦死o左, 仲要係為情自殺, 你會唔傷心咩? 仲要日日俾人指住o黎鬧你係殺人兇手, 廿年o黎活o係呢個陰影下, 仲要咩事業前途都無晒…我相信, 翁美玲都唔想見到咁o既結果!

下期預告: o係網上睇到o既一篇關於“翁美玲之死”o既詳盡報導

(下期續)


(我最喜愛的翁劇: “生[金秀]橋王”劇照)