2-8(tues) 奇洛李維斯回信

前幾日睇電視見到幾台都有奇洛李維B o既訪問, 有線當然一貫地派出英文好“lark”得o既陳貝兒出馬做訪問啦…佢o既英文水準無容置疑, 但係最估唔到係無線搵薛凱琪去訪問李維D, 佢o既表現又真係唔錯喎, 佢講英文仲講得好好聽, even好過同學仔janis, 真係一個可造之材, 抵佢終於等到“奇洛李維斯回信”!

另外, 呢排套“甜孫爺爺”幾好睇, 呢種小品式輕鬆喜劇不嬲我最鍾意…全劇演員都做得好好 (除o左我最唔buy o既楊思琦小姐…真係唔明佢點解可以做萬人迷?! 如果搵其他花旦做女主角, 成套劇都會好睇好多!)…尤其係o個3兄弟…真係做得好似3兄弟! 仲有由比石修個仔更似石修o既方力申, 同埋石修真正o既仔陳宇琛做兩兄弟, 都幾有趣呀! 方力申o既形象亦真係幾健康幾討好…又係另一個可造之材! 仲有劉凱威, 不知不覺都做o左10年, 由新人做到變舊人都無咩代表作…今次俾佢擔咁多戲, 仲要俾佢以第一人身做旁白, 好勁喎!

跟住呢期亦都不停咁聽期待o左好耐o既“903拉闊演唱會之克不容緩”(個名我作o既)…有兩大唱得之人-克勤同埋容joey, 確係好聽o既! 但可能因為我期望太高 (之前本來好想睇呢個演唱會, 但居然撞正公司annual dinner!), 又無我想像中咁咁咁好囉! 當然兩個人唱歌都保持一貫水準, 但係火花又的確唔係太有, 同埋唱某d歌有d吃力…特別係“endless love”…事關佢兩個雖然唱到晒d音, 但畢竟英文唔係佢o地o既“father tongue” (更加唔係佢o地o既“mother tongue”), 完全唱唔出個味道! 呢d歌都係由eason呀, sally呀, 或者彭羚唱比較適合!

同埋克勤雖然唱得好, 但佢唱容祖兒d歌都係怪怪咁…可能d女人歌真係唔太o岩男人唱!