2-4(fri) BEYOND演唱會2005

首先要講o既係前兩日終於排除萬難去o左睇o既beyond concert尾場! 今次真係好排除萬難o架…事關初頭就買唔到飛, 之後加場終於買到但居然發現原來o個日要去飲…所以唯有臨時臨急再撲飛同埋再搵過人同我睇! 不過塞翁失馬, 就係因為咁…我終於可以睇到尾場!

Beyond o既演唱會, 我諗所有我o地年紀o既人都會好期待…2003年o個次Beyond 20週年紀念演唱會, 我好想睇o架嘛…但居然身在英國…好唔開心! 之後睇番vcd, 真係好正! 尤其d歌全部都係耳熟能詳嘛…佢o個次揀d歌, 全屬最經典作品!

所以我今次係好期待去睇呢個演唱會o架, 因為beyond o既歌根本就係陪伴住我o地成長, beyond亦都係我o地成長路o既一個印證! 佢o地d經典歌曲, 相信我o地呢個年齡+/-10歲o既人都會識得唱…所以如果佢o地醒水, 齋食老本齋唱舊歌大家都會好受落!

本來一開場頭個半鐘, 佢o地不停咁唱番d經典歌曲好似“逝去日子” (yeah…好令人有衝動拿番“淘氣雙子星”vcd出o黎睇!), “亞拉伯dancing girl…”, “真的愛你”等等…好多好多! 我已經諗定至少要o係呢度俾200分呢個演唱會…更加要歌頌一下呢個咁精彩o既演唱會! 因為呢d歌其實唔單止係好聽咁簡單, 仲包含o左我o地+前後兩代年青人o既集體回憶! 所有成長於80年代尾至90年代初o既朋友們, 都一定有見證過beyond o既光輝歲月! 所以聽番呢d歌曲簡直有回憶返埋o黎o既感覺!

點知一講到家駒死o左之後, 就完全唔掂喇! 我諗住佢o地頂多唱番三兩隻o個d佢o地“三子時代”o既歌o者, 咁我都仲可以接受呀…點知佢真係想挑戰大家忍耐o既極限, 一連唱o左差唔多一個鐘d完全無人識o既歌! 大家由之前o個個半鐘o既熱血沸騰, 一下子變成悶到hup眼“目訓”…完全唔知佢地想點?! 其實佢o地都已經無需要再o係度嘗試“打”d無人識o既歌…因為打極都唔會hit! 雖然大家都唔想特別強調, 但不得不承認無o左家駒o既beyond真係失色不少…beyond最好聽o既歌, 亦都係由家駒一手創作!

佢o地3個一齊或自己作出o黎o既歌…真係無一隻hit囉! 所以我真係好想同佢o地講: 算吧啦! 繼續食老本吧啦…大家唔介意o架! 總好過你俾d怪歌大家聽以為一新大家o既耳目呀!

雖然之後佢o地都有唱埋“光輝歲月”同埋“amani”等, 但係居然無唱我最鍾意o既“不再猶豫”! 仲有, 其實佢o地仲有好多hit歌未唱, 根本唔需要唱o個d怪歌呀! 佢將大家推向一個悶局之後, 根本大家就好難再興奮番…真係失策!

我同beyond fan屎dr. wong講話呢兩part拉埋我只可以俾50分呢個演唱會…佢話我咁樣一定會俾人打, 話叫我至少要俾70分! 咁我都知beyond d fans出名瘋狂o既, 所以公平d講句, 如果無o左“新歌”o個part, 真係值101分…但拉埋o個part, 真係頂多俾70分囉!

p.s. 世榮唱歌真係進步o左好多, at least把聲響o左好多, 我聽到佢唱咩囉!