1-29(sat) 2004頒獎禮

呢期勁聽hocc隻碟, 真係幾好聽喎! 同埋佢把聲真係幾特別, 至少唔係一般d嬌o爹少女聲…which我最怕! 容祖兒唔係唱得唔好, 只係我個人buy低音多過高音o者!

仲有, 我發覺“女生宿舍”d歌都幾好聽o下, 尤其係“換個話題”同埋新o個隻“俾反應”都唔錯! 獎門人依家一見到佢o地d cd就話: “你偶像呀…!” 其實我只係覺得佢o地d歌揀得幾好, 同埋唱+跳都唔錯o者, 尤其係佢o地唱live都好過初出道o既cookies好多…不過我都係鍾意cookies多d!

我相信過多一排如果女生宿舍可以洗走d娘味 (最娘其實係個組合名!), 都係可造之材o黎o既…最唔掂反而o係o個個土生土長仲中大畢業o既macy; 反而大陸落o黎o既elise都幾ok, 當然最掂係無線高層梁家樹個女toby啦…幾型喎! 所以傳聞話佢o地好快就解散, 淨係留低toby同elise…我覺得都好合理囉!

再回顧番之前想講o既頒獎禮…今年忙到無時間逐一o係呢度discuss, 再加上其實已經熱情不再…睇就依然會睇o既, 但係絕對唔會好似以前咁緊張!

“勁爆”如常地分豬肉, 完全無代表性, 不過當係一個show睇, 星光熠熠, 人人有份永不落空, 都ok o既! 至少皆大歡喜呀!

“叱咤”亦一如以往地懶煽情, 我諗如果d歌星今年唔夠激動, 下年都唔洗旨意可以得獎! 最欣賞係克勤o係古巨基喊到豬頭時露出鄙視o既神色…好抵死! 果然係寸, 但佢依家寸得起呀! 有性格…我鍾意! 不過我亦不得不佩服商台堆人o既說話+煽情技巧, 一日到晚o係度巧立名目, 牽動情緒…佢o地唔去做保險真係o徙o左!

以前細個曾經一度以為“叱咤”真係最公平公開公正o既頒獎禮…當時我真係年少無知…其實呢個世界又邊有公平o架呀…天下o既烏鴉一樣黑! 可能當時覺得佢o既賽果最另類, 又懶係有佢一套評分機制, 仲要現場唱票添…好似好公平咁! 其實所有頒獎禮都只係一場遊戲!

“勁歌”又係一樣啦, 不過今次分豬肉得o黎都幾出人意表…我估到無線今年一定俾華仔重奪最受歡迎男歌手, 但估唔到真係會俾埋亞太區佢囉! 當佢拿完亞太區之後, 個樣真係好失望…我諗住佢實無份啦, 希望又係克勤拿都好過o個個10億作狀古巨基或者已經可以不理o既cheap霸許志安…點知居然又係華仔! 無線果然每年都會搞d gimmick出o黎為大家製造話題…好似當年安仔同sammi一齊得最受歡迎男女歌手而爆出o既“廚房宣言”, 都係因為無線製造o左呢個綽頭出o黎先得以傳頌一時!

至於最尾o個個港台“十大中文金曲”, 好明顯又係力谷華仔, 又力谷埋容祖兒囉…無啦啦俾成半個鐘華仔重演一次佢個演唱會…真係好騎呢! 仲有港台似乎都好buy方力申…以佢o既資力同埋地位, 有咩可能會兩年都有金曲呀? 舊年隻“好心好報”都叫做大hit過, 今年隻“好好戀愛”其實只係一般hit…唔知點解會得金曲, 反而“新四大天王”o既娘炳食o左個白果!

論歌o黎講, 薛凱琪隻“奇洛李維斯回信”真係有大hit過, 同埋真係幾好聽! 如果選金曲, 呢隻真係應該得! 新人獎亦都好應該係佢拿! 唯一唔明o既就係有咩可能吳日言可以打低佢o係新城拿“女新人王”? 之後仲橫掃其餘3個頒獎禮…反而英皇今年滑鐵盧…首次捧新人而居然一個獎都拿唔到…重要係佢o地重點出擊o既isabella, 而唔係話3T o既其餘2T喎! 好神奇!