1-8(sat) 愛(上)

又俾人呃…今次係俾無線呃! 尋晚明明check晒所有節目表又睇埋電視預告, 佢講到明話6點先開始直播大匯演o架嘛, 咁我咪6點先開始錄囉…點知佢又呃我…最終4點就開始播…搞到我miss o左兩個鐘! 明知人o地幾咁緊張睇呢次大匯演o架啦…太過份喇!

亞視又係咁, 全部都欺騙晒我…點解要咁喎?! 其實我應該諗到…咁大個show, 無理由唔由頭播o架嘛…佢o地兩台亦都無理由讓有線專美! 我太太太蠢喇…!

好彩依家資訊發達o左好多, 電視台都多o左n個…比起91年o既“忘我大匯演”, 依家即使miss o左都多好多機會重溫番! 一到呢d大型節目或者有大事件發生, 我就發覺有線o既可愛! 佢播完又播, miss o左都可以睇番…“手禁”“手禁”o下仲發覺華娛同埋另外一d國語電視台都播緊, 一到廣告即刻“手禁”去o個d台錄!

所以最終我諗諗o下都係留番o係屋企睇好過去現場, 事關現場實睇得無咁清楚…同埋錄唔到咁多!

今日咁落力咁去追睇呢個籌款show, 真係好令我憶起當年o既“忘我大匯演”, 但係當日我部錄影機居然壞o左…一個咁重要o既世紀大show我居然錄唔到, 造成我往後十年o既一大遺憾! 唔單只無錄, 仲有好多part無睇…唔知點解咁重要o既日子我仲咁無聊碌落留下合唱團練歌…練少一日唔會死o既o者?! 之後又去o左親戚度食晚飯, 搞到連黎明o既經典走音版“對不起我愛你”都無聽到…what a pity!

好彩! 皇天不負有心人…11年後終於俾我搵到原來愛妃有錄起呢個節目仲有keep起餅帶! 我先可以o係多年後重溫番呢個節目…解開呢個心結!

睇完今次個show, 更加令人想睇番03年o既“1:99音樂會”…無睇到, 又係一個遺憾! 無o左梅姐, 所有籌款節目都真係失色不少!

不過即使到今次個節目完結o個一刻, 都不其然有一絲失落感! 雖然上次“忘我”真係做得好好多, 無咁多悶場, 又多好多variety, 唔會淨係唱歌! 但睇得出今次個節目都有用心去做, 所以都好值得支持! 必須要好好錄起佢, 作為歷史o既見證!

(下期續)