11-23(tues) 台慶後記

講開台慶, 循例都要講番少少觀後感…一個字:“悶”!

d朋友話連我呢d咁hardcore fans都話悶, 咁就一定真係悶到揪筋! 的而且確係好悶, 枉費我特登趕返屋企睇 (雖然某程度上我都係預o左咁悶)! 基本上你係完全知道佢成個節目個flow會係點, 因為呢3,4年o黎年年都一樣…完全無驚喜! 開場一輪歌舞之後, 就抽o下獎, 跟住就頒獎, 然後就係表演環節, 如此類推…!

我完全唔明點解咁都可以有平均35點收視?! 大家真係好俾面tvb! 可能真係個台慶頒獎禮效應…因為今年男女主角獎“競爭激烈”, 所以大家都好緊張碌番屋企睇! 不過話時話, 我都識/聽到好多唔算係電視迷o既朋友都話會碌番屋企睇台慶, 可見台慶就係有一定吸引力!

不過d表演環節真係悶到暈, 又吃力不討好! 根本d藝人就唔係train做雜技團, 你要佢o地玩d高難度動作, 又無咩時間練習…做o既辛苦, 睇o既又辛苦…完全係搵o黎搞! 十多年前d表演高難度得o黎都有d美感…依家只可以話係混亂!

好多人問我對今次台慶頒獎禮o既賽果係咪好失望?! 其實又無咩特別感覺…事關d頒獎禮從來都係一場遊戲一場夢! 不過我估唔到依家連台慶頒獎禮都變到樂壇頒獎禮咁黑暗…之前幾年未鬧到咁大o既時候, 反而個賽果會“公平”好多 (公平as in同公眾o既想法接近好多, 無咁多內幕交易)!

不過佢依家整d驚人賽果都有佢o既好處, 至少可以引起好多talking point, 仲可以搵埋材料俾第一集o既“香港直播”做…又搵高層, 又搵男女主角上去做直播訪問…一舉十幾得! 可以拉高收視嘛! 又可以等黎姿晒o下佢o既演技…即場感觸落淚…演技的確係好過城城好多! 抵佢得獎! 同埋佢同林保怡呢兩個月o黎咁落力搏宣傳, 正如我之前所謂:“無功都有勞”嘛, 應該俾佢o地o既!

最重要係可以俾個機會無線高層解釋o下個投票機制, 話除o左觀眾投票之外, 最重要o既一關係高層o既“專業”評選…所以你又唔可以話佢唔公平喎! 總好過o個d打正“民意為尊”旗號o既頒獎禮…賽果反而就最另類, 名符其實o既小圈子玩意!

如妃亦都一如早前報紙所講“lum”庄做“實力非凡女演員”…咪即係好似華仔年年分得一個 “亞太區最受歡迎男歌手”咁囉…掛名好似更加勁咁, 事實咪係一個安慰獎…真係唔俾好過俾!