4-10(sun) 兩線新劇

今晚有兩線劇集首播…睇預告之後, 發覺第1線o既“同撈同煲”完全唔掂…想學人o地“難兄難弟”, 但d演員又完全唔work喎, 郭晉安同胡杏兒都算啦…o個個咁o既高威利 (馬國明) 扮鄧寄塵就真係完全唔似, 一d天份都無…更加搞笑o既係搵江芷妮做第2女主角…真係太睇得起佢喇! 我覺得佢同唐詩詠有d似樣, 不過唐詩詠個樣+d戲都仲好過佢…都唔知邊個監製咁無taste?!

我發覺d監製用開o個個班底就會永遠用落去, 好似“心花放”同“青出於藍”o既演員班底基本上完全一樣…又陶大宇又郭可盈又秦沛又程可為 (係無o左歐陽震華囉), 跟住呀聰明仔, 仁仔, 四海全部都係“青出於藍”d學生…好熟口熟面! 最終我發現兩套劇o既監製都係梅小青…不過佢都算有進步o架喇, 起碼唔會好似早年咁套套戲都搵佢個妹梅小惠做!

跟住第2線o既“學警雄心”…一睇預告就已經好令人諗起“哪吒不怕海龍王…”…直頭係“新?師兄”o既翻版…不過d人就無咁有型同無咁有活力囉! 我見到o個個彷彿會比風吹走o既陳鍵鋒…就諗起當年關禮傑做o既“好姐”! 講到尾, 我都係最想睇苗僑偉…但點解佢依家會同米雪做一對?! 米雪雖然keep得好好, 但都未至於可以拍苗僑偉呀?!

不過我覺得更加搞笑o既係因為“大長今”大熱…令o個幾位上o左年紀o既師奶尚宮成為香港人o既偶像, 連呀韓尚宮o黎香港都有一大班fans追住佢…睇到呢個場面, 直頭令我諗到韓瑪利行出街俾人追住一樣…真係世事無奇不有! 反而前個禮拜“大飲茶”訪問o個個話同伍詠薇好似樣o既崔尚宮…真人又幾靚喎…40幾歲生o左幾個都仲keep成咁, 真係算唔錯啦!

“韓流襲港”之下最騎呢o既現象都未算係以上所講o既年老韓星急上位, 而係o係無線撈o左近十年都無人識 (應該話連佢個名都無人聽過) o既宋芝齡急上位囉…嘩! 直頭紅過陳慧琳呀…日日黃金時間都會見到佢, 仲可以訪問o個d“眾人偶像”, 真係恨死隔離! 佢由96年同李珊珊一齊選港姐跟住第一個round就俾人out o左之後, 都o係無線做o左無數套劇集o既咖哩啡, 尤其係d邊緣少女角色…估唔到佢消失o左一排之後, 居然因為半個韓國人o既身份令佢有得鹹魚翻生, 真係應該去還神! 其實搵另外一個話係“中韓混血兒”o既amigo做都得呀…橫掂無線呢期又係胡亂o地捧佢!